Technology Khabar ८ फाल्गुन २०८१, बिहीबार
काठमाडौं ।
अमेरिकी टेक जायन्ट एप्पलले बेलायतको प्रतिस्पर्धा नियामकलाई केही प्रस्तावित समाधानहरूले कम्पनीको नवप्रवर्तन गर्ने प्रेरणामा असर गर्ने बताएको छ।
बुधबार सरकारले सार्वजनिक गरेको दस्तावेजमा मोबाइल ब्राउजर र ब्राउजर इञ्जिनहरूको आपूर्ति तथा क्लाउड गेमिङ सेवाहरूको वितरणसम्बन्धी अनुसन्धानमा एप्पल र गुगलको प्रतिक्रिया समावेश गरिएको थियो।
विशेष सुविधाहरू पहुँचसम्बन्धी समाधानका सन्दर्भमा एप्पलले भविष्यको वेबकिट वा आईओएसको सफारीमा प्रयोग भइरहेका सुविधाहरू निःशुल्क उपलब्ध गराउन बाध्य पार्नु उचित नहुने बताएको छ।
कम्पनीका अनुसार यी सुविधाहरू विकास गर्न समय र स्रोत लाग्ने भएकाले यसलाई निःशुल्क उपलब्ध गराउँदा तेस्रो पक्षले त्यसको फाइदा उठाउने र नवप्रवर्तनमा लगानी कम हुने जोखिम रहने रोयटर्सले उल्लेख गरेको छ।
एप्पलले भनेको छ, “यदि हामीले ती खर्चहरू उचित रूपमा उठाउन सकेनौं भने, यसले नवप्रवर्तन गर्ने हाम्रो प्रेरणामा नकारात्मक असर पार्नेछ र तेस्रो पक्षहरूले फाइदा उठाउने तथा लगानी घटाउने स्थिति सिर्जना हुनेछ।”
प्रकाशित: ८ फाल्गुन २०८१, बिहीबार
