दुर्व्यवहारका कारण नेपाली विद्यार्थीले होस्टेलमै आत्महत्या गरेपछि भारतको केआईआईटीले निकाल्यो १ हजार नेपाली विद्यार्थी

काठमाडौं ।

भारतको भुवनेश्वरमा रहेको केआईआईटीका नामले चिनिने कलिङ्गा इन्स्टिच्युट अफ इण्डस्ट्रियल टेक्नोलोजीले त्यहाँ पढिरहेका ५०० भन्दा बढी विद्यार्थीहरुलाई कलेजबाट निकालिदिएको छ।

विश्वविद्यालयको रजिस्ट्रारको हस्तक्षरयुक्त पत्रमा ‘नेपालबाट आएका सबै अन्तरराष्ट्रिय विद्यार्थीहरुका लागि फेब्रुअरी १७ तारिखका दिनबाट लागू हुनेगरी अनिश्चितकालका लागि  विश्वविद्यालय बन्द भएको र उनीहरु सबैलाई तत्काल विश्वविद्यालय खाली गर्न’ निर्देशन दिइएको छ।

विद्यार्थीहरुलाई उनीहरु बसेको होस्टेलको ढोकाढोकामा लात्ति हान्दै बलजफ्ती गएर तुरुन्तै निस्कन लगाइएको र ढिला गर्नेलाई वार्डेनले घाइते हुनेगरी पिटेको विद्यार्थीहरुको भनाई छ।

त्यसपछि जबर्जस्ती इन्स्टिच्युटको बसमा हालेर कटक रेलवे स्टेशनमा छोडिदिएर आफ्नै घर जान भनेको स्टेशनमा अलपत्र परेका विद्यार्थीले बताए। यसरी रेलवे स्टेशनमा अलपत्र परेका नेपाली विद्यार्थीहरु १ हजारभन्दा बढी रहेको पनि उनीहरुले जानकारी दिए।

यो घटना सुनेदेखि अघिल्लो साँझदेखि खाना नखाएका उनीहरुलाई होस्टलबाट बिहानको खानासमेत खान नदिई निकालेको ती विद्यार्थीहरुले बताए। अचानक यस्तो हालतमा रेलवेसम्म छाडिएका उनीहरुसँग टिकट छैन र कहाँ जाने के गर्ने केही टुङ्गो छैन। अलपत्रमध्ये एक विद्यार्थीले अब सबै मिलेर दूतावास जाने र आफ्ना कुरा राख्ने बताए।

आगामी फेब्रुअरी २८ देखि इन्स्टिच्युटको परीक्षा आउँदै गरेको बताउँदै एक विद्यार्थीले आफूहरुलाई परीक्षा बोलाउने नबोलाउने पनि कुनै पक्का नभएको र त्यसबारे केही जानकारी नदिई त्यहाँबाट निस्केर घर जान बताइएको सुनाए।

कारण यस्तो छ

उक्त इन्स्टिच्युटमा बी टेक तेस्रो वर्षमा अध्ययनरत प्रकृति लम्सालले मानसिक तथा शारीरिक दुर्व्यवहारका कारण होस्टेलमै आत्महत्या गरेपछि नाराबाजी गर्न एकजुट भएका नेपाली विद्यार्थीहरुमाथि यस्तो ज्यादति भएको हो।

लम्सालमाथि यसअघि पनि दुर्व्यवहार हुने गरेको र त्यससम्बन्धमा उनले इन्स्टिच्युटमा रहेको अन्तरराष्ट्रिय सम्बन्ध विभागमा पटक पटक गुनासो गर्दा पनि कुनै सुनुवाई नभएपछि डिप्रेसनको शिकार भएर उनले आत्महत्या गरेको एक छात्रले बताए।

एक्स पोस्टमा स्थानीय ओटीभी च्यानलले राखेको सामग्री अनुसार मृतक लम्सालको त्यसै इन्स्टिच्युटमा पढ्ने केटा साथीले उनलाई गालीगलौज गरेको अडियो भेटिएको उल्लेख गरेको छ। स्थानीय प्रहरीले अनुसन्धान गरेर दोषमाथि कारबाही गर्ने बताएको उक्त च्यानलले उल्लेख गरेको छ।