राष्ट्रिय एआई कम्प्युटिङ सेन्टरका लागि १० हजार जीपीयू सुरक्षित गर्दै दक्षिण कोरिया

काठमाडौं ।

दक्षिण कोरियाले सोमबार १०,००० उच्च-प्रदर्शन ग्राफिक्स प्रोसेसिङ युनिट (जीपीयू) प्राप्त/सुरक्षित गर्ने योजना घोषणा गरेको छ। यो कदम विश्वव्यापी एआई प्रतिस्पर्धामा अघि बढ्नका लागि उठाइएको हो।

“एआई उद्योगमा प्रभुत्व जमाउने प्रतिस्पर्धा तीव्र हुँदै जाँदा, प्रतिस्पर्धा कम्पनीहरू बीच मात्र नभई राष्ट्रिय इनोभेसन इकोसिस्टमबीचको पूर्ण स्तरको प्रतिस्पर्धामा परिणत भएको छ,” दक्षिण कोरियाका कार्यवाहक राष्ट्रपति चोइ सांग-मोकले एक विज्ञप्तिमा भने।

चोइका अनुसार सरकारले सार्वजनिक-निजी सहकार्यमार्फत १०,००० जीपीयू प्राप्त गर्ने लक्ष्य राखेको छ। यसले राष्ट्रिय एआई कम्प्युटिङ केन्द्रका सेवाहरू छिट्टै सञ्चालन गर्न मद्दत गर्नेछ।

गत महिनामा अमेरिकी सरकारले अत्याधुनिक एआई एप्लिकेसनका लागि आवश्यक अमेरिकी एआई चिप र प्रविधिको प्रवाहलाई नियमन गर्न नयाँ नियम घोषणा गरेको थियो।

उक्त नियमले जीपीयूको निर्यातलाई सीमित गर्दछ, जुन विशेष रूपमा ग्राफिक्स रेन्डरिङलाई तीव्र बनाउन विकसित गरिएको थियो।

रोयटर्सका अनुसार एआई मोडेलको लागि आवश्यक जीपीयूको संख्या जीपीयू को स्तर, प्रयोग गरिने डाटा, मोडेलको आकार, र मोडेल प्रशिक्षणका लागि आवश्यक समय जस्ता कारकहरूमा निर्भर गर्छ।

नियमअनुसार विश्वका देशहरूलाई विभिन्न श्रेणीहरूमा विभाजन गरिएको छ। दक्षिण कोरिया झण्डै १८ देशहरूको समूहमा पर्छ, जुन यी प्रतिबन्धहरूबाट प्रायः मुक्त छ। तर १२० देशहरूमा सीमितता लगाइनेछ भने इरान, चीन, र रूसलाई पूर्ण रूपमा प्रतिबन्ध गरिएको छ।

दक्षिण कोरियाली सरकारले कुन जीपीयू मोडेलहरू, र संलग्न निजी कम्पनीहरूको विवरण यस वर्ष सेप्टेम्बरभित्र टुंगो लगाइनेछ, विज्ञान तथा सूचना प्रविधि मन्त्रालयका एक अधिकारीले रोयटर्सलाई बताए।

यसैबीच, अमेरिकी चिप डिजाइनर एनभिडिया जसको जेनरेटिभ एआई र तीव्र कम्प्युटिङका लागि चिपहरूको माग उच्च छ, विश्व जीपीयू बजारको झण्डै ८० प्रतिशत हिस्सा ओगट्छ। एनभिडियाका प्रमुख प्रतिस्पर्धी इन्टेल र एएमडीहुन्।

यसै समयमा, माइक्रोसफ्टको समर्थन प्राप्त ओपनएआईले एनभिडियामा निर्भरता घटाउने योजना अघि बढाइरहेको छ। रोयटर्सका अनुसार, ओपनएआई आफ्नो पहिलो पुस्ताको इन-हाउस एआई चिप विकास गरिरहेको छ। ओपनएआईको चर्चित च्याटबोट च्याटजीपीटी हजारौं जीपीयूहरूमा प्रशिक्षित र सुधार गरिएको छ।

ओपनएआईले आगामी केही महिनामा पहिलो इन-हाउस चिपको डिजाइन पूरा गर्ने योजना बनाएको छ र यसको निर्माण ताइवान सेमिकन्डक्टर म्यानुफ्याक्चरिङ कम्पनी (टीएसएमसी) मार्फत गराउने तयारी छ।

चिनियाँ स्टार्टअप डीपसिकको उदयले एआई प्रतिस्पर्धालाई नयाँ मोड दिएको छ। यस कम्पनीले गणनात्मक कार्यक्षमता सुधार गरेर अमेरिकी चिपहरू भन्दा कमशक्तिशाली चिनियाँ एआई प्रोसेसरको प्रभावकारिता बढाउने प्रयास गरिरहेको रोयटर्सले उल्लेख गरेको छ।