सामसङले नेटवर्क गुणस्तर सुधार गर्न सिक्सजीमा एआई लागू गर्ने

काठमाडौं ।

दक्षिण कोरियाली प्रविधि दिग्गज सामसङले सन् २०२० मा सिक्सजीको बारेमा आफ्नो पहिलो ह्वाइट पेपर (श्वेतपत्र) प्रकाशित गरेको थियो। त्यसैगरी आजको दिनमा सञ्चारतर्फ भविष्यको बाटोमा कम्पनी कहाँ छ भन्ने बारे थप कुराहरूको खुलासा गरेको छ।

नयाँ ह्वाइट पेपर (श्वेतपत्र) मा कम्पनीले टेलिकम्युनिकेसन प्रणालीमा नवीनतम एआई प्रविधिलाई एकीकृत गरेर भविष्य उन्मुख र दिगो प्रयोगकर्ता अनुभवका लागि नेटवर्कको गुणस्तर सुधार गर्ने लक्ष्य राखेको बताएको छ।

ह्वाइट पेपर (श्वेतपत्र) सामान्यतया एक जानकारीमूलक कागजात हो जसले सरल शब्दहरूमा भविष्यका योजनाहरू प्रस्तुत गर्दछ र यस अवस्थामा, सामसङले सिक्सजीले कसरी कनेक्टिभिटीलाई बढावा र गति दिनेछ भनेर वर्णन गरेको छ। त्यसमा सिक्स्थ–जेन वायरलेस नेटवर्कहरूबाट लाभ हुने अपेक्षा गरिएको पाँच सेवाहरू समावेश हुनेछन्ः

•  मनोरञ्जन, स्वास्थ्य सेवा र विज्ञानको लागि इमर्सिभ एक्सआर;
• सुरक्षा कारणहरूका लागि भौतिक संस्थाहरू (होलोग्रामहरू कल्पना गर्नुहोस्) को भर्चुअल रेप्लिकाहरुका लागि डिजिटल ट्विन;
• मल्टिपल सेन्सरहरू, मेशिनहरू, र टर्मिनलहरू बीच निरन्तर कनेक्टिभिटीलाई अनुमति दिने बृहत सञ्चार;
• सर्वव्यापी कनेक्टिभिटी, सेवा क्षेत्रहरू विस्तार गर्दै र भूसतही र गैर–भूसतही (उपग्रह) नेटवर्कहरू बीच अन्तरक्रिया;
• फिक्स्ड वायरलेस एक्सेस (एफडब्ल्यूए), जुन वायर्ड (तार) कनेक्टिभिटी जस्तै हो तर तार बिना।

यो सबै एआई टेक्नोलोजीहरूद्वारा बृद्धि गरिनेछ, जसले प्रयोगकर्तालाई भविष्यको अनुभव मात्र नभइ लागत घटाउन, ऊर्जा दक्षता बढाउन र सेवा कभरेज विस्तार गर्न मद्दत गर्ने उल्लेख गरिएको छ।

यी सबै सेवाहरू कागजमा राम्रो देखिने भए तापनि तिनीहरू कहिले पूरा हुनेछन् भन्ने प्रश्न आएको छ। सामसङले सिक्सजी प्रविधिको मापदण्डलाई सन् २०३० मा अन्तिम रूप दिने छ भने अनुसन्धान र विकासमा चाँडै नै तीव्रता आउने अपेक्षा गरिएको जीएसएमएरिनाले उल्लेख गरेको छ।