आईफोन १६ सँग तुलना गरिएको आईफोन एसई ४ को तस्बिरहरू लीक

काठमाडौं ।

आईफोन एसई ४ अप्रिल महिनाको वरपर लन्च हुने अपेक्षा गरिएको छ र लीकहरू आउने क्रम पनि जारी नै रहेको छ। एसई ४ को डिजाइनको लुक साझा गरेका लीकस्टर मजिन बु ले आईफोन १६ सँगसँगै एसई ४ प्रोडक्ट डमीको अतिरिक्त तस्बिरहरू पोस्ट गरेका छन्।

उक्त तस्बिरहरूमा दुई डिभाइसहरूको लुक समान रहेको देख्न सकिने छ। यद्यपि १६ मा फ्रेमको किनार वरिपरि राउन्ड हुनुका साथै डिस्प्ले र पछाडि ट्यापर्स रहेको छ। तुलनात्मक रूपमा, एसई ४ को फ्रेम सार्प भएको बताइएको छ र डिभाइसले आईफोन १४ को चेसिस पुनः प्रयोग गरिरहेको हुनाले यसमा कुनै आश्चर्यको कुरा नभएको उल्लेख गरिएको छ।

एसई ४ मा सिङ्गल रियर क्यामरा समावेश गरिएको देखिन सकिन्छ। साथै तस्बिरहरूमा रहेको युनिट प्रोडक्ट डमी भएको बताइएको छ जुन केस एक्सेसरिज निर्माताहरूलाई फोनको लागि केसहरू डिजाइन गर्न मद्दत गर्न प्रयोग गरिन्छ। त्यसैले एसई ४ को अन्तिम डिजाइनमा ठूलो बम्प नहुने सम्भावनको पनि उल्लेख गरिएको छ।

अघिल्लो लीक अनुसार, एप्पलले ए१८ चिप र ८ जीबी र्याम, एप्पल इन्टेलिजेन्स, ४८ मेगापिक्सेलको क्यामरा र ५०० अमेरिकी डलरको शुरुवाती मूल्यको साथ अप्रिल महिना सम्ममा आईफोन एसई ४ लन्च गर्ने अपेक्षा गरिएको जीएसएमएरिनाले उल्लेख गरेको छ।