माइक्रोसफ्ट मातहतको एआई परियोजनाका लागि यूएईमा उन्नत चिप निर्यात गर्न अमेरिकाको इजाजत

काठमाडौं ।

अमेरिकी सरकारले संयुक्त अरब इमिरेट्स (यूएई) मा माइक्रोसफ्टद्वारा सञ्चालित सुविधातर्फ उन्नत कृत्रिम बुद्धिमत्ता (एआई) चिप्सको निर्यातलाई स्वीकृति दिएको छ। यो स्वीकृति माइक्रोसफ्ट र इमिरेट्सको एआई  कम्पनी जी४२ बीचको सहकार्यको भागस्वरूप आएको हो। एक्सिओसले दुई स्रोतहरूलाई उद्धृत गर्दै यो रिपोर्ट शनिबार सार्वजनिक गरेको हो।

यस वर्षको सुरुवातमा माइक्रोसफ्टले जी४२ मा १.५ अर्ब डलर लगानी गरेको थियो, जसले अमेरिकी कम्पनीलाई जी४२ मा अल्पसंख्यक हिस्सेदारी र एक बोर्ड सीट प्रदान गरेको छ। यो सम्झौताअनुसार जी४२ ले आफ्ना एआई एप्लिकेसनहरू सञ्चालन गर्न माइक्रोसफ्टका क्लाउड सेवाहरू प्रयोग गर्नेछ।

तर यो सहकार्यको आलोचना भएको छ किनभने अमेरिकी सांसदहरूले जी४२ ले शक्तिशाली अमेरिकी एआई प्रविधि चीनमा स्थानान्तरण गर्न सक्ने चिन्ता व्यक्त गरेका थिए। सांसदहरूले जी४२ को चिनियाँ कम्युनिस्ट पार्टी, सैन्य र सरकारसँगको सम्बन्धको मूल्यांकन गर्न माग गरेका थिए।

एक्सओसको रिपोर्ट अनुसार स्वीकृत निर्यात अनुमतिले माइक्रोसफ्टलाई यूएई मा रहेको सुविधामा यस्ता व्यक्तिहरूको पहुँच रोक्न निर्देश गरेको छ जो अमेरिकी हतियार प्रतिबन्धमा परेका देशहरू वा अमेरिकी वाणिज्य विभागको एन्टिटी सूचीमा रहेका छन्। यसमा चीनमा रहेका व्यक्तिहरू, चिनियाँ सरकार, वा चीनमा आधारित संस्थाका कर्मचारीहरू समावेश छन्।

रोयटर्सका अनुसार अमेरिकी अधिकारीहरूले एआई प्रणालीहरूले रासायनिक, जैविक, र आणविक हतियारको निर्माणलाई सहज बनाउनेजस्ता राष्ट्रिय सुरक्षामा जोखिम पुर्‍याउन सक्ने बताएङ्का छन्। बाइडेन प्रशासनले यस वर्ष अक्टोबरमा ठूला एआई प्रणालीका निर्माताहरूलाई ती प्रणालीका विवरण अमेरिकी सरकारसँग साझा गर्न अनिवार्य बनाएको थियो।

जी४२ ले यस वर्षको सुरुमा अमेरिकी साझेदारहरू र यूएई सरकारसँग एआई विकास र कार्यान्वयन मापदण्डको पालना गर्न सक्रिय रूपमा काम गरिरहेको बताएको थियो ।

जी४२ मा अबुधाबीको सोभरेन वेल्थ फन्ड मुबाडाला इन्भेस्टमेन्ट कम्पनी, यूएईको शाही परिवार, र अमेरिकी निजी इक्विटी कम्पनी सिल्भर लेक को हिस्सेदारी छ। जी४२ का अध्यक्ष शेख तहनुन बिन जायद अल नाह्यान यूएई का राष्ट्रिय सुरक्षा सल्लाहकार र यूएई का राष्ट्रपतिको दाजु हुन्।