ट्रूकलरको भारतस्थित कार्यालयबाट आयकर अधिकारीले बरामद गरे कर छलीको डिजिटल प्रमाण

काठमाडौं ।

गत साता बिहीबार भारतीय आयकर विभागले ट्रूकलरको भारतस्थित कार्यालयमा अनुगमन गरेको छ। यसको पछाडि करको अनियमितता रहेको मानिन्छ। भारतीय आयकर विभागले अहिलेसम्म त्यस्तो कुनै पुष्टि नगरेको भए पनि स्रोतलाई उद्धृत गर्दै एक रिपोर्टमा आयकर अधिकारीले कम्पनीका दुई कार्यालयबाट कर छलीका केही प्रमाण बरामद गरेको दाबी गरेको छ।

स्वीडेनी टेक कम्पनी ट्रूकलरको आधिकारिक वेबसाइट अनुसार, भारतमा कम्पनीका कुल तीन कार्यालयहरू गुरुग्राम, मुम्बई र बेंगलुरुमा अवस्थित छन्। कम्पनीको मुख्यालय स्टकहोममा छ।

ट्रूकलरले गत बिहीबार एक विज्ञप्ति जारी गरी आयकर अधिकारीहरूलाई पूर्णरूपमा सहयोग गरिरहेको बताएको छ।

आयकर विभागले बिहीबार कर छलीको आरोपमा स्विडेनी कलर आइडी प्लेटफर्म ट्रूकलरको कार्यालयमा अनुगमन गरेको थियो। भारतीय मिडिया न्यूज १८ को रिपोर्ट अनुसार, कर छलीका डिजिटल प्रमाण र केही अन्य महत्त्वपूर्ण कागजातहरू अधिकारीहरूले जफत गरेका थिए। रिपोर्टले यी अनुगमनहरू ट्रूकलरको गुरुग्राम र बेंगलुरु कार्यालयहरूमा सञ्चालन गरिएको उल्लेख गरेको छ।

आयकर अधिकारीहरूले सर्वेक्षण सञ्चालनको उद्देश्य स्थानान्तरण मूल्य निर्धारण (टीपी) मुद्दाहरू लगायत कर छलीका केही आरोपहरूको सम्बन्धमा विस्तृत जानकारी सङ्कलन र कागजातहरू जाँच गर्नु रहेको बताएका छन्।

कम्पनीले स्विडेनी र भारतीय दुवै कानुनको पालना सुनिश्चित गर्न नियमित स्वतन्त्र लेखा परीक्षण गर्ने बताएको छ।

ट्रूकलरका भारतमा ४० करोडभन्दा बढी सक्रिय प्रयोगकर्ताहरू रहेको रिपोर्टमा उल्लेख छ।