Technology Khabar २२ आश्विन २०८१, मंगलवार
काठमाडौं ।
एप्पलले सन् २०२५ को सुरुवातमा आईफोन एसई लन्च गर्ने तयारी गरिरहेको अर्को एक स्रोतले दावी गरेको छ। ब्लुमबर्गका मार्क गर्मनले समय सीमा खुलासा गरेको केही दिनपछि यो अफवाहहरू आएको जीएसएमएरिनाले जनाएको छ।
यसका साथै नयाँ जानकारीले स्पेक्स र फिचरहरूको बारेमा थप विवरणहरू प्रकट गरेको जनाइएको छ।
९टु५म्याक सँग कुरा गर्ने स्रोतहरूका अनुसार चौथो आईफोन एसईको फ्रन्टमा आधुनिक लुक हुने जनाइएको छ जुन नच र फेसआईडी भएको आईफोन १४ जस्तै समान रहने उल्लेख गरिएको छ।
साथै यसमा एप्पल ए१८ चिपसेट हुनेछ भने गत वर्षको आईफोन १५ बाट केही क्यामराहरू पनि सापट लिने थप उल्लेख गरिएको छ।
सन् २०२२ मा लन्च गरिएको हालको आईफोन एसई वास्तवमा नयाँ चिपसेट सहितको आईफोन ८ भएको जनाइएको छ। यद्यपि आगामी आईफोन एसई (२०२५) फाइभजी कनेक्टिभिटी भएको पहिलो किफायती एप्पल फोन हुनेछ जसको श्रेय नयाँ चिपलाई दिइएको छ।
त्यसैगरी फोनको अगाडिको भागमा २,५३१ × १,१७० पिक्सेल रेजोल्युसन भएको ६.१ इन्चको ओएलईडी प्यानल हुनेछ भने साइडहरू फ्ल्याट (समतल) हुने उल्लेख गरिएको छ।
साथै टच आईडी बन्द हुने भएकोले अब केवल फेस आईडी बायोमेट्रिक्स अथेन्टिकेसन (प्रमाणीकरण) फिचर रहने थप उल्लेख गरिएको छ।
थ्रीडी फेस स्क्यानिङ सोलुसनमा १२ मेगापिक्सेलको सेल्फी शूटर हुने जनाइएको छ। फोनको पछाडिको भागमा भने अघिल्लो आईफोन एसईमा जस्तै एउटा मात्र क्यामरा हुने जनाइएको छ। यद्यपि उक्त क्यामरा आईफोन १५ को ४८ मेगापिक्सेलको मुख्य क्यामरा हुने थप उल्लेख गरिएको छ।
आगामी आईफोन एसई (२०२५) ले एप्पल इन्टेलिजेन्सको लागि एप्पल ए१८ चिप समावेश गरेको हुनुपर्ने उल्लेख गरिएको छ। आईफोन १६ सिरिजको विपरीत डिभाइसहरूमा एआई फिचरहरू शुरुमै दिइने आशा गरिएको छ। तर ईयू र चीनमा भने यी सेटहरु निकट भविष्यमा रोल आउट नहुने थप उल्लेख गरिएको छ।
एप्पलले आईफोन एसई (२०२२) लाई ४२९ अमेरिकी डलरमा लन्च गरेको थियो। सन् २०२५ को संस्करण भने ४५९ वा ४९९ अमेरिकी डलर बाट मूल्य सुरु हुने अपेक्षा गरिएको जीएसएमएरिनाले उल्लेख गरेको छ।
प्रकाशित: २२ आश्विन २०८१, मंगलवार
