अलिबाबा होल्डिङ्सको पहिलो त्रैमासको कमाई अपेक्षा गरेको बिन्दुभन्दा कम

काठमाडौं ।

अलिबाबा ग्रुप होल्डिंग्सले बिहीबार पहिलो त्रैमासिकको आम्दानी सार्वजनिक गरेको छ। जसअनुसार संस्थाले यसअघि गरिएको प्रक्षेपण बिन्दु भेट्न असफल रहेको छ।

कम्पनीको घरेलु ई-कमर्स बिक्री चिनियाँ उपभोक्ताहरूको मन्द अर्थतन्त्रमा सचेत हिसाबले खर्च गर्ने प्रवृत्तिका कारण दबाबमा आएकाले सोचे अनुरुप आम्दानी हुन नसकेको अलिबाबाको बुझाई छ।

कम्पनीको अमेरिकामा सूचीबद्ध सेयरहरू प्रिमार्केट ट्रेडिङमा करिब ४ प्रतिशतले घटेको थियो। चीनको अस्थिर आर्थिक पुनरुत्थान, कमजोर सम्पत्ति बजार, र उच्च रोजगार असुरक्षाका स्तरहरूले विश्वको दोस्रो ठूलो अर्थतन्त्रमा उपभोक्ताहरूको विश्वास र खर्च गर्ने शक्ति कमजोर बनाएको र यसले विश्वभरका फर्महरूलाई असर गरेको  समाचार संस्था रोयटर्सले उल्लेख गरेको छ।

अलिबाबालाई जेडी डटकम र पीडीडी होल्डिंग्सको पिन्दुओडुओ र बाइटडान्सको डोउयिन जस्ता छूटमा-केन्द्रित भएर सञ्चालित खुद्रा प्लेटफर्महरू सहितका प्रतिस्पर्धीहरूसँग कडा प्रतिस्पर्धाको सामना गर्नु परिरहेको छ।

अलिबाबाले गत जुन मसान्तमा समाप्त भएको त्रैमासको लागि २४३ अर्ब युआन  अर्थात् लगभग ३४ अर्ब डलर आम्दानी गरेको बताएको छ। एलएसईजीको तथ्याङ्क अनुसार यो विवरण विश्लेषकहरूको औसत अनुमान २४९ अर्ब युआनभन्दा कम हो।

कम्पनीको घरेलु ई-कमर्स शाखाको राजस्व १% ले घटेको छ, यद्यपि खरिदकर्ताहरूको संख्या र उनीहरूको खरिद गर्ने आवृत्तिले अर्डर वृद्धिलाई दोहोरो अंकले बढाएको समाचारमा उल्लेख  छ।