हमास नेताबारे मलेसियाली प्रधानमन्त्रीको पोस्ट हटाएकोमा मेटाले माग्यो माफी

काठमाडौं ।

मेटा प्लेटफर्मले मंगलबार मलेसियाली प्रधानमन्त्री अनवर इब्राहिमसँग माफी मागेको छ। इब्राहिमले आफ्नो फेसबुक र इन्स्टाग्राममा गत हप्ता हमासका नेता इस्माइल हानियेको हत्या भएकोबारे गरेको पोस्ट मेटाले हटाइदिएको थियो ।

मलेसियाले हानियेको मृत्युमा शोक व्यक्त गर्दै लेखेको पोस्ट हटाएकोबारे मेटासँग स्पष्टीकरण माग गरेको थियो। ‘हामी सञ्चालन गल्तीका कारण मलेसियाली प्रधानमन्त्रीको फेसबुक र इन्स्टाग्रामबाट हटाइएकोमा क्षमा प्रार्थी छौं, हाल उक्त पोस्ट समाचारीय मूल्य मान्यतासहित पुन: राखिसकिएको छ’, मेटाका प्रवक्ताले आफूहरुलाई इमेलमा पठाएङ्को समाचार संस्था रोयटर्सले जनाएको छ।

मलेसियाका सञ्चारमन्त्री तथा प्रधानमन्त्री कार्यालयका सदस्यहरुले सोमबार बयान/स्पस्टिकरणका लागि मेटाका प्रतिनिधिहरुलाई भेटेका थिए। ‘प्रधानमन्त्रीको कार्यालयले मेटाको यो कार्यलाई भेदभावपूर्ण, न्यायविरोधी र अभिव्यक्ति स्वतन्त्रताको गम्भीर हनन् भएको ठहर गरेको छ’, प्रधानमन्त्री कार्यालयले सोमबार जारी गरेको विज्ञप्तिमा उल्लेख छ।