प्रकाशनको ३३ वर्षमा किन बन्द हुँदैछ गेम इन्फर्मर म्यागाजिन?

काठमाडौं ।

विगत ३३ वर्षदेखि प्रकाशन हुँदै आएको गेमिङ म्यागाजिन गेम इन्फर्मर बन्द हुने भएको छ। गेम तथा गेमिङ एसेसरिहरु बिक्री गर्ने कम्पनी गेमस्टपले हालै आफ्नो मातहत प्रकाशन हुँदै आएको म्यागाजिन बन्द गर्ने घोषणाले थुप्रै गेम तथा यससँग सम्बन्धित जानकारी लिँदै आएका पारखीहरु चिन्तित भएका छन्।

अन्तरराष्ट्रिय समाचार संस्था द भर्जले जनाए अनुसार यो म्यागाजिन बन्द भएसँगै गेम इन्फर्मरको वेबसाइट पनि बन्द हुनेछ भने यससँग सम्बन्धित सबै कर्मचारीसमेत हटाइनेछन्।

द लास्ट अफ अस गेम डेभलपर संस्था नटी डगका क्रियटिभ हेड तथा एचबीओमा चलेको एउटा शोका निर्माता नील ड्रकम्यानले भने, ‘गेमसम्बन्धी यस्ता थुप्रै कुराहरु जानकारी लिँदै हुर्किएकाहरुको लागि हाम्रो गेमिङ क्षेत्रकै प्रख्यात म्यागाजिन गेम इन्फर्मर पढ्न पाउनु साँच्चै नै रोमाञ्चक र इज्जतिलो कुरा थियो।’

उनले यो उद्योगकै यस प्रकारको अग्रणी प्रकाशन अब बन्द भएकोमा दु:ख व्यक्त गर्दै यसमा हालसम्म संलग्न सबैलाई शुभकामनाका शब्दका साथमा उनीहरु सबैको काम सँधै सम्झिइरहने पनि थपे।

‘भिडियो गेम उद्योगमा तपाईँहरुले जे ल्याउनुभएको थियो त्यसका लागि धन्यवाद’, एक्समा रहेको आधिकारिक कोनामी एकाउण्टमा राखिएको पोस्टमा भनिएको छ, ‘ हामी यसको आगामी अंक हाम्रा इमेलमा आउने सुन्दर प्रतीक्षामा उत्सुकतापूर्वक बस्न कहिल्यै बन्द गर्ने छैनौं । तपाईँको विरासत र प्रभाव सदैव रहिरहनेछ।’

कोनामी जापानको एउटा बहुराष्ट्रिय मनोरञ्जन कम्पनीका साथै भिडियो गेम डेभलपर संस्था हो । यसबाहेक यो कम्पनीले गेम तथा क्यासिनोहरुमा प्रयोग हुने ट्रेडिङ कार्ड, स्लट मेशिन तथा आर्केड क्याबिनेटलगायतका सामानहरु  पनि बिक्री गर्ने गर्छ।

यसै क्रममा डिस्कर्ड साइबरपंक २०७७ एसासिन्स क्रीड मेटाक्रिटिक तथा एक्स गेमिङले पनि सामाजिक सञ्जालहरुमा गेम इन्फर्मरको योगदानको सराहना गरेका छन्।

प्राय: सुन्दर कस्टम आर्टका माध्यमबाट विभिन्न गेमसम्बन्धी जानकारी प्रदान गर्दै आएको गेम इन्फर्मरको उत्कृष्ट कभरेजलाई अन्य धेरैले सम्झना गरिरहेका छन्।