एप्पलको सन् २०२४ को तेस्रो आर्थिक त्रैमासको आम्दानी अपेक्षा गरेभन्दा बढी

काठमाडौं ।

एप्पलले शुक्रबार यस वर्षको तेस्रो आर्थिक त्रैमासिकको वित्तीय नतिजा सार्वजनिक गरेको छ। प्रतिवेदनका अनुसार यस अवधिमा कम्पनीको राजस्व ८५.८ अर्ब डलर रहेको र एक्सपेक्टेड भ्यालु (अपेक्षित मूल्य) ८४.४६ अर्ब डलर भन्दा बढी भएको उल्लेख छ।

यस अवधिमा आईफोनहरू बाट ३९.३० बिलियन अमेरिकी डलर राजस्व संकलन भएको छ। यद्यपि अपेक्षित मूल्य ३८.९५ बिलियन अमेरिकी डलरको गरिएको थियो।

अन्य डिभाइसहरूको कुरा गर्दा, म्याक र आईप्याडहरूबाट क्रमशः ७.०१ बिलियन अमेरिकी डलर र ७.१६ बिलियन अमेरिकी डलर राजस्व संकलन भएको जनाइएको छ। साथै संकलन भएको राजस्व दुबै डिभाइसहरूको लागि अपेक्षा गरिएको भन्दा बढी भएको थप उल्लेख छ। म्याक र आईप्याडहरूको लागि क्रमशः ६.९८ बिलियन अमेरिकी डलर र ६.६३ बिलियन अमेरिकी डलर अपेक्षा गरिएको थियो।

त्यसैगरी वेयरेबल डिभाइस, होम र एक्सेसरिज डिभाइसहरूले तेस्रो त्रैमासिकमा ८.१० बिलियन अमेरिकी डलर राजस्व बटुलेका छन् जुन ७.७९ बिलियन अमेरिकी डलरको अपेक्षित राजस्व भन्दा पनि बढी भएको जनाइएको छ। विभिन्न सेवाहरूबाट २४.२१ बिलियन अमेरिकी डलरको राजस्व रिपोर्ट गरिएको छ, जसमा विश्लेषकहरूले २३.९६ बिलियन अमेरिकी डलरको अपेक्षा गरेका थिए।

तेस्रो त्रैमासिकमा प्रति शेयर आय १.४० अमेरिकी डलर रहेको छ।

कम्पनीले पछिल्लो त्रैमासिकमा प्रति शेयर आम्दानी र राजस्व दुवैको लागि उल्लेखनीय रूपमा नयाँ रेकर्ड कायम गरेको छ भने सर्भिसेस क्याटोगरीले नयाँ सर्वकालीन राजस्व रेकर्ड कायम गरेको छ। त्यसैगरी आईप्याडहरूबाट राजस्व उल्लेखनीय रूपमा वृद्धि भएको जनाइएको छ। साथै नयाँ आईप्याड प्रो र आईप्याड एयर मोडेलहरूको भर्खरै प्रक्षेपणको कारणले उक्त वृद्धि भएको हुनसक्ने उल्लेख छ।

यस त्रैमासिकमा कम्पनीको कुल मार्जिन ४६.३ प्रतिशत भएको छ, जुन अघिल्लो वर्षको सोही अवधिमा ४४.५ प्रतिशत थियो। यसबाहेक कम्पनीले प्रति सेयर ०.२५ अमेरिकी डलरको त्रैमासिक लाभांश पनि घोषणा गरेको छ।

“आज, एप्पलले ८५.८ बिलियन अमेरिकी डलर राजस्वमा नयाँ त्रैमासिक रेकर्ड रिपोर्ट गरेको छ, जुन एक वर्ष अघिको भन्दा ५ प्रतिशतले बढी छ” एप्पलका सीईओ टिम कुकले बताएका छन्।