विश्वव्यापी स्मार्टफोन ढुवानी सन् २०२४ को दोस्रो त्रैमासमा १२ प्रतिशतले बढ्यो

काठमाडौं ।

विश्वव्यापी स्मार्टफोन ढुवानी सन् २०२४ को दोस्रो त्रैमासिकमा वार्षिक दरमा १२ प्रतिशतले बढेर २८८.९ मिलियन एकाइ पुगेको र उक्त वृद्धि लगातार तेस्रो त्रैमासिक वृद्धि भएको छ। बजार अनुसन्धान फर्म क्यानालिसका अनुसार, उद्योगले इनोभेटिभ प्रोडक्ट लन्चेज (नवीन उत्पादन प्रक्षेपण) र आर्थिक अवस्थामा भएको सुधारबाट संचालित पुनरुत्थानको अनुभव गरिरहेको उल्लेख छ।

सामसङले आफ्नो नेतृत्वलाई बलियो बनायो

तथ्यांकअनुसार, सामसङले ५३.५ मिलियन इकाइ ढुवानी गर्दै १८ प्रतिशत सेयरको साथ मार्केट लिडरको रूपमा आफ्नो स्थिति बलियो बनाएको छ। साथै कम्पनीको हाई–इण्ड डिभाइसहरूले राजस्व वृद्धिलाई ड्राइभ गर्न जारी राखेको छ।

त्यसैगरी उत्तर अमेरिका र एशिया–प्रशान्त क्षेत्रमा बलियो प्रदर्शनका साथ ४५.६ मिलियन इकाइहरू ढुवानी गर्दै एप्पल दोस्रो स्थानमा रहन सफल भएको छ।

तेस्रो स्थानमा रहेको शाओमीले ४२.३ मिलियन एकाइ ढुवानी गरेको उल्लेख छ। चिनियाँ टेक जायन्टको प्रतिस्पर्धी उत्पादन लाइनअपले यसको तीव्र वृद्धिलाई बढावा दिएको जनाइएको छ। शाओमीले सन् २०२४ को दोस्रो त्रैमासिकमा भारतको स्मार्टफोन बजारमा पनि शीर्ष स्थान पुनः प्राप्त गरेको र १८ प्रतिशत बजार हिस्सा कब्जा गरेको छ।

भिभोले २५.९ मिलियन युनिटका साथ चौथो स्थान पुनः दावी गरेको छ भने टेक्नो र इन्फिनिक्स ब्रान्डेड स्मार्टफोनहरू बनाउने ट्रान्ससनले २५.५ मिलियन युनिटहरू ढुवानी गर्दै शीर्ष पाँचमा परेको उल्लेख छ।

समग्र बजार उकालो लागेको भएतापनि चुनौतीहरू पनि अगाडि रहेको प्रतिवेदनमा जनाइएको छ। विशेष गरी हाई–इण्ड फिचर्सहरूको लागि ठूला डिस्प्ले र उन्नत क्यामराहरू जस्तो कम्पोनेन्ट अभावले उत्पादन लागतलाई असर गर्न थालेको छ। यसले ठूलो बजारलाई लक्षित गर्ने ब्रान्डहरूलाई दबाब दिन सक्ने थप उल्लेख छ।

बजारमा अगाडि रहनको लागि, उद्योगका नेताहरूले उनीहरूको अफर (प्रस्ताव) हरू फरक पार्नमा ध्यान केन्द्रित गरिरहेका छन्। सामसङ र एप्पलले स्थापित बजारहरूमा दीर्घकालीन रणनीतिहरूलाई प्राथमिकता दिइरहेका छन् र तिनीहरूले आफ्नो फ्ल्यागशिप डिभाइसहरूमा जेनेरेटिभ एआई सुविधाहरूमा जोड दिइरहेको जनाइएको छ। त्यसैगरी चिनियाँ ब्रान्डहरूले पनि उच्चस्तरीय खण्डमा प्रतिस्पर्धा गर्न एआई प्रविधिमा ठूलो लगानी गरिरहेका छन्।

स्मार्टफोनको बजार विकास हुँदै गइरहेको अवस्थामा उपभोक्ताहरूले थप एआई–संचालित सुविधाहरू, उन्नत क्यामरा प्रणालीहरू र ठूला, थप इमर्सिभ डिस्प्लेहरू हेर्ने आशा गर्न सक्नेछन्। यद्यपि, कम्पोनेन्टहरूको बढ्दो लागतले प्रिमियम उडिभाइसहरूको लागि उच्च मूल्य निम्त्याउन सक्ने प्रतिवेदनमा उल्लेख गरिएको छ।