इसेवाको ‘सेन्ड मनि’ सेवा प्रयोग गर्दा आजदेखि शुल्क लाग्ने

काठमाडौं ।

नेपाल सरकारको आर्थिक विधेयक २०८१ बाट आयकर ऐन २०७८ को दफा ८१ क अन्तर्गत व्यावसायिक कारोबार बापतको रकम व्यक्तिगत खातामा जम्मा गर्न नपाइने नियमको कडारुपमा पालना गर्न आन्तरिक राजस्व विभागको करदाता शाखाको निर्देशन रहेको छ।

निर्देशनअनुसार कुनै पनि व्यक्तिले व्यावसायिक कारोबार बापत प्राप्त नगद, चेक, क्यू आर कोड तथा अन्य कुनै पनि विद्युतीय माध्यमबाट प्राप्त हुने कुनै पनि रकम व्यक्तिगत बैंक खातामा जम्मा गर्न पाइने छैन।

जारी आर्थिक वर्ष २०८१/८२ को बजेटको पूर्णपाठमा उल्लेखित “व्यावसायिक कारोबारको भुक्तानी विद्युतीय माध्यम वा क्यूआर कोड मार्फत गर्दा व्यावसायिक खातामा भुक्तानी गर्नुपर्ने कानुनी व्यवस्था” बमोजिम व्यावसायिक कारोबार व्यावसायिक क्यूआर मार्फत गर्न प्रोत्साहनका लागि यही अगस्ट १, २०२४ अर्थात आजदेखि इसेवाको सेन्ड मनि (Send Money) सेवा प्रयोग गर्दा शुल्क लाग्ने जानकारी गराएको छ।

कम्पनीकाअनुसार, कारोबार दिनमा ३ पटक गरि महिनामा ३० पटक सम्म नि:शुल्क रहनेछ, साथै रु.१०० मुनिका सबै सेन्ड मनि कारोबार निःशुल्क रहनेछन्। यो बाहेकका सबै सेन्ड मनि कारोबारमा प्रति कारोबार रु.१० सेवा शुल्क लागू हुने बताएको छ।

नेपाल सरकारको निर्देशनअनुसार इसेवाले आफ्ना प्रयोगकर्ताहरुलाई पनि आफ्नो व्यापार तथा व्यवसायको भुक्तानी आफ्नो व्यक्तिगत इसेवा खातामा जम्मा नगर्न अनुरोध गरेको छ।

व्यापार व्यवसायमा भुक्तानी कारोबारलाई सहजीकरण गर्न मर्चेन्ट बनेर भुक्तानी रकमको निम्ति आफ्नो व्यावसायिक खाताको प्रयोग गर्न इसेवा सुझाव दिनका साथसाथै सो कार्य सम्भव गर्न हरबखत तयार रहेको जानकारी दिएको छ। आफ्नो व्यापार व्यवसायमा भुक्तानी लिन इसेवाको प्रयोग गर्न आजै इसेवा मर्चेन्ट बनी इसेवा मर्चेन्ट खाता खोल्न आग्रह गरेको छ।

व्यावसायिक खातामा क्यूआर तथा अन्य कुनै माध्यमबाट रकम भुक्तानी गर्दा कुनै पनि प्रकारको शुल्क नलाग्ने जनाएको छ।