मेटा प्लेटफर्मले दोस्रो त्रैमासमा गर्यो अपेक्षा गरेभन्दा बढी आम्दानी

काठमाडौं ।

फेसबुकको मूल कम्पनी मेटा प्लेटफर्मले दोस्रो त्रैमासमा अपेक्षा गरिएको भन्दा बढी आम्दानी गरेको छ। बुधबार आफ्नो प्रक्षेपित आम्दानी र दोस्रो त्रैमासमा भएको वास्तविक आम्दानीबारे जानकारी दिँदै कम्पनीले आगामी तेस्रो त्रैमासका लागि पनि आकर्षक प्रक्षेपण गरेको छ।

तेस्रो त्रैमासको प्रक्षेपणका क्रममा कम्पनीले आफ्ना सामाजिक सञ्जालमा हुने विज्ञापनको बिक्री मजबुत रहेमा यसले आर्टिफिसियल इन्टेलिजेन्सका क्षेत्रमा भइरहेको खर्च उठ्ने बताइएको अन्तरराष्ट्रिय समाचार संस्था रोयटर्सले उल्लेख गरेको छ।

हालै कम्पनीको सेयर ६.८ प्रतिशतले बढेको थियो । फेसबुक इन्स्टाग्राम ह्वाट्सएपलगायतका एपहरुको मूल कम्पनी मेटाले तेस्रो त्रैमासमा ३८.५ देखि ४१ अर्बसम्म हुने प्रक्षेपण गरेको छ ।

यो आँकडाको मध्यबिन्दु ४० अर्ब डलर हुन आउँछ जुन यसअघि विश्लेषकहरुले गरेको ३९.१ अर्बभन्दा बढी रहेको छ।

दोस्रो त्रैमास अर्थात् अप्रिलदेखि जुनसम्म कम्पनीको आम्दानी २२ प्रतिशतले बढेर ३९.१ अर्ब डलर पुगेको र यो आँकडा विश्लेषकहरुले प्रक्षेपण गरेको ३८.३ अर्ब डलरभन्दा बढी रहेको मेटाको भनाई छ।

मेटाका चिफ फाइनान्सियल अफिसर सुजन लिले विश्लेषकहरुलाई बताए अनुसार कम्पनीको विज्ञापनको माग विश्वमा राम्रो रहेको र कम्पनीले हालआफ्ना प्लेटफर्महरुमा डिजिटल विज्ञापनको लक्षित समूह पहिचान गर्न, स्तरीकरण गर्न तथा डेलिभरी सिस्टमलाई सुधार गर्ने हेतुले आर्टिफिसियल इन्टेलिजेन्स प्रयोग गर्ने बहुवर्षीय योजनाको प्रतिफल लिइरहेको हो।