धोखाधडी गरेको आरोप लगाउँदै क्राउडस्ट्राइकका सेयरधनीले हाले कम्पनीविरुद्ध मुद्दा

काठमाडौं ।

केही दिनअघि गलत सफ्टवेयर अपडेटका कारण विश्वभर ८५ लाख विण्डोज डिभाइसलाई प्रभाव पार्नेगरी भएको आउटेजलाई लिएर सेयरधनीहरुले कम्पनीविरुद्ध मुद्दा दायर गरेका छन्।

सेयरधनीहरुले कम्पनीले के कति कारणले उक्त अपरिपक्व सफ्टवेयर अपडेटले विश्वभरका ८५ लाखभन्दा बढी डिभाइसहरुलाई असर पार्यो भन्ने कुरा लुकाएको आरोप लगाएका छन्।

अस्टिनमा रहेको टेक्सस संघीय अदालतमा गत मंगलबार दर्ता गरिएको उक्त प्रस्तावित क्लास एक्शन मुद्दामा ती सेयरधनीहरुले क्राउडस्ट्राइकले आफ्ना प्रविधिबारे पहिले गरेका प्रत्याभूतिहरु गलत रहेको थाहा भएको बताए।

अन्तरराष्ट्रिय समाचार संस्था रोयटर्सका अनुसार ती सेयरधनीहरुले उक्त घटना भएको १२ दिनभित्र क्राउडस्ट्राइकको सेयर मूल्य ३२ प्रतिशतले घटेको र यसबाट कम्पनीले २५ अर्ब डलर बराबरको मार्केट भ्यालु गुमाएको बताए ।

यसबारेमा सुनुवाईका लागि कम्पनीका सीईओ जर्ज कर्ट्जलाई अमेरिकी कंग्रेसमा बोलाइएङ्को थियो भने यो समस्याबाट ग्रस्तमध्ये एक डेल्टा एयरलाइन्सले नोक्सानको विवरण निकाल्नका लागि प्रख्यात वकील डेभिड बोइसलाई नियुक्त गरेको बुझिएको छ।

उक्त उजुरीमा गत मार्च ५ तारिखका दिन सीईओ कर्ट्जले कन्फरेन्सक कलका क्रममा क्राउडस्ट्राइकको सफ्टवेयर ‘प्रामाणिक, परीक्षण गरिएको र सर्टिफाइड’ रहेको भन्ने वाक्य उल्लेख गरिएको थियो।

बुधबार क्राउडस्ट्राइकले भनेको थियो, ‘यो मुद्दामा कुनै आधार छैन भन्ने हामीलाई विश्वास छ तसर्थ हामी कम्पनीको बचाउमा कुनै कसर छाड्नेछैनौ ।’ सीईओ कर्ट्ज र चिफ फाइनान्सियल अफिसर बर्ट पड्बेरे पनि पनि उक्त मुद्दाका प्रमुख प्रतिवादी बनाइएको समाचारमा उल्लेख छ ।