बाल यौन दुराचारसम्बन्धी सामग्रीको सही तथ्याङ्क नबुझाएको एप्पलमाथि आरोप

काठमाडौं ।

एप्पलमाथि आफ्नाे प्लेटफर्ममा रहेका बाल यौन दुराचारसम्बद्ध सामग्रीहरुकाे बारेमा पर्याप्त जानकारी नियामक निकायलाई नबुझाएकाे आराेप लागेकाे छ।

बेलायतकाे नेशनल साेसाइटी फर द प्रिभेन्सन अफ क्रुयल्टी टू चिल्ड्रेन नामक बाल बचाउ च्यारिटी संस्थाले एप्पलले गत वर्ष विश्वभरबाट जम्मा २६७ मात्र यस्ता घटना नेशनल सेन्टर फर मिसिङ एण्ड एक्स्प्लाेइटेड चिल्ड्रेन नामक नियामक निकायमा बुझाएकाे आराेप लगाएकाे हाे।

अन्तरराष्ट्रिय समाचार संस्था इन्ग्याजेटका अनुसार उक्त सङ्ख्या साेही अवधिमा गुगलले  बुझाएकाे १५ लाख हाराहारी तथा मेटाले बुझाएकाे साढे ३० लाखकाे तुलनामा नगण्य मात्र हाे।

गत वर्ष एप्पलका तुलनामा धेरै सङ्ख्यामा यस प्रकारका सामग्रीबारेकाे उजुरीका तथ्याङक बुझाउनेमा टिकटक ६ लाख हाराहारी, एक्स अर्थात् ट्विटर ६ लाख हाराहारी, स्न्यापच्याट ७ लाखभन्दा बढी, एक्सबक्स १५ सयभन्दा बढी, प्लेस्टेशन ४ लाख हाराहारी रहेका छन्।

प्रत्येक अमेरिकी प्रविधि कम्पनीले आफ्ना प्लेटफर्ममा देखिएका कुनैपनि यस्ता सामग्री उक्त नियामक केन्द्रलाई बुझाउनुपर्छ र केन्द्रले घटनाक्रम हेरेर विश्वभरका विभिन्न न्यायिालिकामा पठाउने गर्दछ।

उक्त केन्द्रले पनि इङ्ल्याण्ड र वेल्समा मात्रै अप्रिल २०२२अप्रिल देखि मार्च २०२३ भित्र एप्पलमा ३३७ यस्ता उजुरी रहेकामा एप्पलले गत वर्षभरि नै विश्वभरमा भेटिएको भन्दै बुझाएको २६७ घटना कम र मिथ्या रहेकाे बताएको छ ।

यसैले उक्त च्यारिटी संस्थाले सही तथ्याक पाउन लागि प्रहरीसमक्ष फ्रीडम अफ इन्फरमेशनकाे अधिकार प्रयाेग गरेकाे छ। फ्रीडम अफ इन्फरमेशन नेपालमा प्रयोग गरिने सूचनाको हकको प्रावधान जस्तै हो।

उक्त केन्द्रकाे दाबीका बारेमा पहिलाेपटक समाचार लेखेकाे द गार्जियनले एप्पलका आईमेसेज, फेसटाइम र आईक्लाउड सबैमा इन्ड टु इन्ड इन्क्रिप्सशन (दुईपक्षका बीच मात्र गाेप्य रहने) फिचर रहेकाले कम्पनीले कुन प्रयाेगकर्ताले के के शेयर गरे भनेर हेर्न नसकिने बताएकाे छ।

तर इन्ड टु इन्ड इन्क्रिप्सशन उपलब्ध भएकाे व्हाट्सएपले भने गत वर्ष आफ्नो प्लेटफर्ममा १४ लाख बरबरी यस्ता घटनाहरुकाे तथ्यांक रहेको उक्त केन्द्रसमक्ष  बुझाएकाे थियाे।

यस सम्बन्धमा च्यारिटी संस्थाको चाइल्ड सेफ्टि अनलाइन पाेलिसीका प्रमुख रिचर्ड काेलार्डले भने, “बेलायतमा भएका बालयाैन दुराचारका तस्बिरसम्बधि घटनाहरुकाे तथ्याङ्क र एप्पलले प्रस्तुत गरेकाे यससम्बन्धी घटनाकाे सङ्ख्यामा आकाशपातालकाे फरक छ । अझ उनीहरुले नियामक निकायसमक्ष बुझाएकाे सङख्या एउटा देशकाे नभई विश्पव्यापी  आँकडा हाे।”