विद्युतीय टोकनसहितको एकीकृत सेवा

काठमाडौं ।

रुकुमपश्चिमको चौरजहारी नगरपालिकाले पहिलो पटक विद्युतीय टोकन प्रणालीसहितको एकीकृत सेवा प्रवाह सञ्चालन केन्द्र सञ्चालनमा ल्याएको छ।

केही समयअघि एकीकृत सेवा प्रवाह सञ्चालन केन्द्र सञ्चालनमा ल्याएको नगरपालिकाले हाल विद्युतीय टोकन प्रणालीसहितको सेवा सञ्चालनमा ल्याएको हो। नगरपालिकाबाट प्रवाह हुने सेवालाई एकीकृत र सेवाग्राहीमैत्री बनाउन यो केन्द्र सञ्चालनमा ल्याइएको नगरपालिकाले जनाएको छ।

नगरप्रमुख पुष्प बादीले काम र भेटघाटका लागि आएका सेवाग्राहीले सोही अनुसारको टोकन लिने र त्यसपछिको कामका लागि नगरपालिकाकै कर्मचारी परिचालन हुने व्यवस्था मिलाइएको बताए। नगरप्रमुख बादीले भने, “टोकन अनुसार सिस्टममा कामको विवरण इन्ट्री हुन्छ। सेवाग्राही फाँट र कर्मचारी खोज्दै जानु पर्दैन, एकीकृत सेवा प्रवाह सञ्चालन केन्द्रमै बसेपछि काम भएर फाइल आइपुग्छ।”

एकीकृत सेवा प्रवाह सञ्चालन केन्द्रमा कामको प्रगतिको अडियो र डिजिटल बोर्डमार्फत जानकारीका साथै वाइफाई सुविधा राखिएको छ।

नगरपालिकाले एकीकृत सेवा प्रवाह सञ्चालन कार्यविधि २०८० समेत जारी गरेर यो केन्द्र सञ्चालनमा ल्याएको हो।

नगरपालिकाका निमित्त प्रमुख प्रशासकीय अधिकृत शेरप्रसाद ढकालका अनुसार एकीकृत सेवा प्रवाह केन्द्रले कुन शाखा, के के कागजात आवश्यक पर्ने, कति समय लाग्नेलगायतका विवरण पहिचान गर्ने गर्दछ।

सेवाग्राही फाइल बोकेर सम्बन्धित शाखा, उपशाखा, एकाइ तथा फाँटमा जानै पर्दैन। काम भएर सेवाग्राहीको हातमै सेवा आइपुग्ने व्यवस्था मिलाइएको छ।

फाइल ओसारपसारको बन्दोबस्ती पनि कार्यालयले आफ्नैजनशक्तिबाट मिलाएको ढकालले बताए। एकीकृत सेवा प्रवाहबाट सेवा लिँदा सेवाग्राहीले विद्युतीय टोकन प्रणालीको प्रयोग, सेवा प्रवाहको अवस्था तथा प्रगतिसम्बन्धी सेवाग्राही प्रतिक्षा कक्षमा सूचना बोर्डमार्फत जानकारी दिने काम गरिएको छ।

त्यसै गरी समय कार्डको व्यवस्था, कुन शाखा, उपशाखा, फाँट र एकाइसँग सम्बन्धित सेवा हो भन्नेबारे फाइल वर्गीकरणपश्चात् शाखा, उपशाखा, फाँट र एकाइ प्रमुखलाई सूचना प्राप्त हुने व्यवस्था गरिएको छ। गोरखापत्रबाट