सामसङको ग्यालेक्सी एआईले हिन्दीसहित १६ भाषाहरूलाई समर्थन गर्ने

काठमाडौं ।

सामसङको ग्यालेक्सी एआईले हालै १६ भाषाहरू समावेश गर्न आफ्नो भाषा क्षमताहरू विस्तार गरेको छ। शैक्षिक संस्थाहरूसँगको विश्वव्यापी सहकार्य र साझेदारीले यो महत्त्वपूर्ण उपलब्धि सम्भव भएको उल्लेख छ।

साथै यस विकासको प्रमुख खेलाडी सामसङ आर एन्ड डी इन्स्टिच्युट इन्डिया बेङ्गलुरु (एसआरआई–बी) हो र यो कोरिया बाहिरको कम्पनीको सबैभन्दा ठूलो अनुसन्धान केन्द्र हो।

सामसङ ग्यालेक्सी एआईले हिन्दी भाषालाई समर्थन गर्दै

सामसङका अनुसार, एसआरआई–बीले हिन्दी एआई मोडेलको विकासको नेतृत्व गरेको र जुन भाषाका धेरै बोलीहरू, टोनल भिन्नताहरू र अङ्ग्रेजी शब्दहरूसँग बारम्बार मिश्रणको कारणले जटिल उपक्रम भएको उल्लेख छ। एआईले हिन्दीको अद्वितीय ध्वन्यात्मक संरचनालाई सही रूपमा समात्न सुनिश्चित गर्नका लागि स्थानीय भाषाविद्हरूको विशेषज्ञतासँगै अनुवादित र ट्रान्सलिरेटेड डाटाको संयोजन प्रयोग गरेर टोलीले यो चुनौती सामना गरेको थियो।

त्यसैगरी भेलोर इन्स्टिच्युट अफ टेक्नोलोजीले ग्यालेक्सी एआईमा विश्वव्यापी रूपमा सबैभन्दा बढी बोलिने भाषाहरुमा चौथो रहेको हिन्दी भाषालाई समावेश गर्न आवश्यक पर्ने कन्भर्सेसनल स्पिच, शब्दहरू र कमान्ड (आदेश) हरू सहितको ठूलो मात्रामा क्युरेट गरिएको अडियो डाटा उपलब्ध गराउन महत्त्वपूर्ण भूमिका खेलेको थियो।

रिपोर्टअनुसार, ग्यालेक्सी एआई प्लेटफर्ममा भियतनामी, थाई र इन्डोनेसियालीलाई ल्याउनका लागि एसआरआई–बी ले विश्वभरका अन्य सामसङ अनुसन्धान केन्द्रहरूसँग मिलेर काम गरेको थियो। ग्यालेक्सी एआईमा विस्तारित भाषा समर्थन, लाइभ ट्रान्स्लेट, इन्टर्प्रेटर, नोट असिस्ट, र ब्राउजिङ असिस्ट जस्ता फिचर्सहरू मार्फत पहुँचयोग्य हुनुका साथै प्रयोगकर्ताहरूलाई तिनीहरूको भाषा सीपहरू अफलाइनमा पनि बढाउन सक्षम बनाउने उल्लेख गरिएको छ।

त्यसैगरी, सामसङले बहु बजारहरूको लागि आफ्नो अर्को अनप्याक्ड कार्यक्रम जुलाई १० मा आयोजना गर्ने भएको छ। कार्यक्रममा ग्यालेक्सी जेड फोल्ड ६, जेड फ्लिप ६, ग्यालेक्सी वाच ७, ग्यालेक्सी वाच अल्ट्रा, ग्यालेक्सी बड्स ३ सिरिज र ग्यालेक्सी रिङ जस्ता धेरै नयाँ डिभाइसहरू आउने अपेक्षा गरिएको छ।

साथै यस वर्षको सुरुमा ग्यालेक्सी एस२४ सिरिजको स्मार्टफोनहरूमा प्रस्तुत गरिएको ग्यालेक्सी एआईको परिष्कृत अनुभव अब उक्त कार्यक्रमको प्रमुख विशेषताहरूको रुपमा यी डिभाइसहरूले प्रदान गर्ने अपेक्षा गरिएको रिपोर्टमा उल्लेख छ।