सन् २०३० सम्म एआई स्मार्टफोनले बजारको ९० प्रतिशत हिस्सा ओगट्ने ह्वावे अधिकारीको भविष्यवाणी

काठमाडौं ।

चिनियाँ टेक जायन्ट ह्वावेका एक अधिकारीले सन् २०३० सम्ममा एआई स्मार्टफोनले बजारको ९० प्रतिशत हिस्सा ओगट्ने भविष्यवाणी गरेका छन्।

सांघाईमा आयोजित ग्लोबल फाइभजी–ए कमर्शियल पायलट प्रोग्राम लन्च कन्फरेन्स (सम्मेलन) मा ह्वावेका कार्यकारी निर्देशक तथा आईसीटी इन्फ्रास्ट्रक्चर बिजनेस म्यानेजमेन्ट कमिटीका अध्यक्ष वाङ ताओले एआई–संचालित स्मार्टफोनहरूको अनुपातले कसरी परिवर्तन (वा वृद्धि) ल्याउन सक्छ भन्ने बताएका छन्।

एआई–संचालित स्मार्टफोनहरूले यस वर्षको शिपमेन्ट (ढुवानी) मा ११ प्रतिशत योगदान गर्ने वाङ ताओ विश्वास व्यक्त गरेका छन्। साथै यो सन् २०३० सम्ममा ९० प्रतिशत पुग्न सक्ने उनले थप बताए। उनको भनाइबाट एलएलएम र प्रमुख एआई फिचर्सहरूको एकीकरण केही वर्षभित्रमा स्मार्टफोनका लागि मानक बन्नसक्ने देखिन्छ।

“हामी चाँडै एआईबाट ट्राफिकमा ठूलो वृद्धि देख्नेछौं। साथसाथै, फाइभजी–ए नेटवर्कहरूले हाईयर स्पिड (उच्च गति), लोअर लेटेन्सी (कम विलम्बता) र एआई युगको नेटवर्क मागहरू पूरा गर्न ठूलो क्षमता प्रदान गर्न सक्षम हुनेछ,” वाङ ताओले भने।

हाल, ह्वावे, ओप्पो, सामसङ, गुगल, र एप्पल जस्ता विभिन्न चिनियाँ र अन्य निर्माताहरूका धेरै फ्ल्यागशिप स्मार्टफोनहरूले डिभाइसमा निश्चित कार्यहरू गर्नका लागि केही सामान्य लार्ज ल्याङ्गवेज मोडेलहरू एकीकृत गरेका छन् र जसले केही फाइदाहरू पनि प्रदान गर्ने गरेको छ। साथै यसले उन्नत फिचर्स (सुविधाहरू) लाई अझ सुरक्षित बनाउनुका साथै इन्टरनेट जडानको आवश्यकता पनि नपर्ने उल्लेख गरिएको छ।

थप उन्नत सुविधाहरूको लागि, ठूला एलएलएम चलाउने क्लाउड सर्भरसँग फोनले सम्पर्क गर्नेछन्। एलएलएमहरू अझ प्रभावकारी हुँदै जाँदा, र चिपहरू थप सक्षम हुँदै जाँदा, कम्पनीहरूले अन–डिभाइसमा थप फिचरहरू चलाउन सक्षम हुनेछन्, जसले प्रयोगकर्ताका लागि थप आकर्षक मात्र नबनाएर यसको क्लाउड सर्भरहरूको सञ्चालन लागत घटाएर उत्पादकहरूलाई पनि फाइदा पुग्ने सम्भावना रहेको उल्लेख गरिएको गीज्मोचाइनाले रिपोर्ट गरेको छ।