विश्वकप फुटबलको प्रत्यक्ष प्रसारण डिस होमको एक्सन स्पोर्ट्स च्यानलमा, नेपाली भाषामा कमेन्ट्री हुने

काठमाडौं ।

काठमाडौं । यहि जेठ ३१ गतेदेखि रुसमा आयोजना हुन गईरहेको विश्वकप फुटबल २०१८ को प्रत्यक्ष प्रसारण डिस होमको एक्सन स्पोर्ट्स च्यानलले गर्ने भएको छ । सो च्यानलमा विश्वकप फुटबल प्रत्यक्ष प्रसारणको नेपाली भाषामा कमेन्ट्री हुनेछ ।

प्रत्यक्ष प्रसारणमा वरिष्ठ कमेन्टेटर संजिव शिल्पकारले खेलको नेपाली कमेन्ट्री गर्नेछन् ।

डिस होममा बजार व्यवस्थापक कल्याण अधिकारीले पहिलो पटक नेपाली भाषामा कमेन्ट्री गर्न लागिएको जानकारी दिए । ‘शहरमा मात्र नभई गाउँमा पनि डिस होमको दर्शकहरु भएको हुँदा उनीहरुको लागि समेत हुनेगरि नेपाली भाषामा कमेन्ट्री गर्न लागिएको हो,’ उनले भने ।

विश्वकपका खेल विश्लेषणका लागि फुटबलसँग सम्बन्धित केहि चर्चित व्यक्तित्वहरु सहित अन्य व्यक्तिहरु पनि आबद्ध हुने बताईएको छ । फुटबल जगत बाहिरका व्यक्तिहरुमा पत्रकार ऋषि धमला, कमेडियन विल्सन विक्रम राईका प्रतिक्रियाहरु पनि कार्यक्रममा प्रसारण गरिने छन् ।

यसैबिचमाा चार बर्षमा एक चोटि आउने विश्वकपको प्रसारणको प्रचार गर्न डिश होमले प्रोमोसन भिडियो पनि बनाएको छ । सो भिडियोमा नेपाल आइडलका शीर्ष तीनमा पर्न सफल गायक प्रताप दासले स्वर दिएका छन् । ‘फुटबलको महाकुम्भ’ नामक भिडियो नेपाली च्यानलले विश्वकपलाई लक्षित गरेर सार्वजनिक गरेको पहिलो गीत पनि हो।

प्रशारण अघि र पछि खेलको विश्लेषण र समिक्षा पनि नेपाली भाषामा नै हुने हुँदा सामान्य नेपाली दर्शकहरुले समेत सजिलै बुझ्न सक्ने डिसहोमले जनाएको छ।