काठमाडौं ।
एप्पलको आईफोन १५ सिरिज दक्षिण कोरियामा अक्टोबर १३ मा रिलिज हुने कार्यक्रम रहेको छ। तर केही विज्ञहरूले भने केही मोडलको अभाव हुनसक्ने अनुमान गरेका छन्।
चीन र जापान जस्ता देशहरूमा आईफोन १५ सिरिज रिलिज भइसकेको छ तर त्यहाँ पनि फोनहरुको कमी भएकाले कोरियामा पनि यस्तो हुन सक्ने सम्भावना रहको ईटीन्युजको रिपोर्टमा उल्लेख गरिएको छ।
त्यसैगरी चीनमा आईफोन १५ प्रो म्याक्सको लागि अपेक्षित ढुवानी मिति यस अघि नै आपूर्ति अभावको कारण नोभेम्बरसम्मका लागि स्थगित गरिएको छ।
उद्योग विशेषज्ञहरूले यस अभावले गर्दा कोरियामा आईफोन १५ सिरिजका टप मोडलहरूलाई असर गर्ने सम्भावना रहेको अनुमान गरेका छन्।यसअघि आईफोन १४ लन्चको समयमा पनि प्रो मोडल जस्ता टप मोडलहरूको अभाव भएको थियो।
आईफोन एमजेड जेनेरेसनमा धेरै लोकप्रिय भएकाले त्यहाँ आईफोन १५ सिरिजको विशेष गरी टप मोडलहरूको लागि माग उच्च हुने सम्भावना रहेको अनुमान गरिएको छ।
कोरियाली वितरकहरूले पनि अभावको सम्भावनाको लागि तयारी गरिरहेको उल्लेख गरिएको छ। “हामी आईफोन १५ सिरिजको प्रि–अर्डर सुरु हुन अघि परिमाण अनुमान गर्न र बुझ्नको लागि भनेर आईफोन १५ सिरिजका लागि अस्थायी आरक्षणहरू स्वीकार गर्दैछौं र त्यहाँ निश्चित रूपमा आईफोन १४ सिरिज भन्दा बढी रिजर्भेसनहरू हुनेछन्।” एक कोरियाली टेलिकम कर्मचारीले भने।
“यो सिरिजमा यूएसबी–सी टाइपले सुसज्जित भएको हुनाले धेरै मानिसहरूले आईफोन १५ सिरिज खोज्ने छन्” भन्दै एक एसके टेलिकमका कर्मचारीले पनि बताएको उल्लेख छ।
गत वर्ष कोरियामा आईफोन १४ प्रो को अभाव भएको थियो र त्यो अभाव धेरै हप्तासम्म रहन गएको थियो। त्यस बेला एप्पल कोरिया वेबसाइटमार्फत अनलाइन बिक्री गरिएका एकाइहरूको लागि पनि उपभोक्ताहरूले आईफोन १४ प्रो प्राप्त गर्न एक महिना भन्दा बढी कुर्नुपरेको गीज्मोचाइनामा उल्लेख गरिएको छ।
प्रकाशित: १८ आश्विन २०८०, बिहीबार
