६० हजार भन्दा बढी एन्ड्रोइड एप गडबडीको शिकार, कतै तपाईंले पनि डाउनलोड गर्नुभयो कि

काठमाडौं ।

एक साइबर सुरक्षा फर्मले दाबी गरेअनुसार पछिल्लो छ महिनामा ६० हजार  भन्दा बढी एन्ड्रोइड एपहरूमा एडवेयर फेला परेको छ, जसले नराम्रो उद्देश्य भएका डेभलपर्सहरुका लागि स्मार्टफोनको पृष्ठभूमि वा अग्रभूमिमा कुनै न कुनै रूपमा विज्ञापनहरू चलाएर पैसा कमाउने काम गर्दछ।

एडवेयर्स (Adwares) यसरी डिजाइन गरिएको छ कि यो साधारण प्रयोगकर्ताको नियन्त्रणमा आउँदैन। रिपोर्टमा एडवेयरबाट संक्रमित एप आधिकारिक गुगल प्ले स्टोरमा उपलब्ध नभएको बताएको छ। यसको सट्टा, तिनीहरू तेस्रो-पक्षिय स्टोरहरूमा र इन्टरनेटमा एपीकेको रूपमा डाउनलोड गर्नका लागि उपलब्ध छन्।

बिटडिफेन्डरको रिपोर्टका अनुसार पछिल्लो ६ महिनामा कम्तिमा ६०,००० एन्ड्रोइड एपहरूमा एडवेयर फेला परेको छ। एडवेयरहरुले प्राय: पृष्ठभूमिमा विज्ञापनहरू चलाउनको लागि काम गर्दछ र यसको कारण, स्मार्टफोनको ब्याट्री ब्याकअपमा नराम्रो प्रभाव पर्छ। तिनीहरूले स्मार्टफोनको कार्यसम्पादनलाई पनि असर गर्छ।

रिपोर्टहरूले सुझाव दिन्छ कि संक्रमित एपहरू आधिकारिक गुगल प्ले स्टोरमा फेला परेका छैनन्, तर योग्य तेस्रो-पक्ष एप स्टोर वा वेबसाइटहरूमा गुगल सर्च मार्फत खोजी गर्दा भेटिएका छन्। यति मात्र होइन, यी थर्ड-पार्टी एपहरू मध्ये धेरैले नेटफ्लिक्स, युट्युब, टिकटक जस्ता लोकप्रिय एपहरूको नक्कल गर्छन् र प्रिमियम एपहरूको नि:शुल्क भीपीएन वा विज्ञापन-रहित अनुभव प्रदान गर्ने दाबी पनि गर्छन्।

यी वेबसाइटहरूले साधारण प्रयोगकर्तालाई सजिलै मूर्ख बनाउन सक्छन्, किनभने जब प्रयोगकर्ताले गुगल खोजबाट कथित रूपमा तेस्रो-पक्षिय वेबसाइट खोल्छ, उसलाई एक विज्ञापन पृष्ठमा लगिन्छ, जुन वैध डाउनलोड पृष्ठ जस्तो देखिन्छ। तर यसले वास्तवमा डिभाइसमा सिधै एडवेयर इन्स्टल गर्दछ।

एक पटक स्मार्टफोनमा एप इन्स्टल र खोलिएपछि, यसले इरर म्यासेज र एप अनइन्स्टल गर्ने विकल्प देखाउँछ। तर, प्रयोगकर्ताले यसलाई अनइन्स्टल गरेपनि, एडवेयर स्मार्टफोनमा रहन्छ र पृष्ठभूमिमा चल्न जारी राख्छ।

बिटडिफेन्डरको सेक्यूरिटी रिपोर्टअनुसार मालवेयरद्वारा नक्कल गरिएका यस्ता एपहरूका केही प्रकारहरुमा गेम क्र्याक अनलक सुविधाहरू भएका गेम्स, नि: शुल्क भीपीएन, नक्कली भिडियोहरू, नेटफ्लिक्स, नक्कली ट्यूटोरियलहरू, विज्ञापन बिनाका युट्युब/टिकटक, क्र्याक गरिएको युटिलिटी कार्यक्रमहरू: मौसम, पिडिएफ भ्यूअर्स, फेक सेक्यूरिटी प्रोग्राम्स लगायत रहेका छन्।