काठमाडौं ।
एनिमेटेड चलचित्र सुपर मारियो ब्रदर्स रिलिज भएको एक महिनाभन्दा कम अवधिमा एक अर्ब डलरभन्दा बढी कलेक्सन गर्ने क्लबमा प्रवेश गरेको छ। गत सप्ताहन्तमा यसको अन्तर्राष्ट्रिय बक्स अफिस कलेक्सन १.०२ बिलियन डलर थियो। यो चलचित्रलाई युवा लगायत सबै उमेर समुहका दर्शकले रुचाइरहेका छन्।
यसले अमेरिका बाहिर ५३२.५ मिलियन डलर संकलन गरेको छ। चलचित्रको ठिकैको समीक्षाहरूको बावजुद, मुखारीत प्रचार र दर्शकहरूलाई आकर्षित गर्ने पिजी रेटिंगले यसलाई बक्स अफिसमा राम्रो गर्न मद्दत गरेको बताईएको छ।
यसले अमेरिका र क्यानडामा करिब ४९० मिलियन डलर कमाएको छ। यो अहिलेसम्मकै सबैभन्दा धेरै कमाउने भिडियो गेम चलचित्र पनि बन्यो। यो गत साता जापानमा रिलिज भएको हो। पछिल्ला केही महिनाहरूमा कुनै पनि अन्य बच्चाहरूको चलचित्र रिलिज नभएको फाइदा समेत सुपर मारियो ब्रदर्स चलचित्रले पाएको छ।
आरोन होर्भाथ र माइकल जेलेनिकद्वारा निर्देशित सुपर मारियो ब्रदर्सले, प्रमुख चलचित्र मूल्याङ्कन साइटहरूमा ९६ प्रतिशत दर्शक स्कोर कमाएको छ। चलचित्रले इटालियन प्रवासी प्लंबर मारियो (क्रिस प्राट) र लुइगी (चार्ली डे) लाई पछ्याउँछ, जसलाई जादुयुक्त ‘मशरूम किङ्गडम’मा लगिन्छ र चर्को स्वरमा बोल्ने बाउजर (ज्याक ब्ल्याक) विरुद्ध लडाइँमा फ्याँकिन्छ। मारियो यस मिशनको लागि राजकुमारी पीच (आन्या टेलर जोय), टोड (कीगन माइकल की), डंकी किङ्ग (सेथ रोजेन) र सम्पूर्ण मशरूम सेनासँग मिलेर टोली बनाउँछन्। यो अभियानमा अगाडि बढ्नु ठूलो साहसिक र रोमान्चक कार्य भएको देखाईएको छ।
हलिउडमा यस्ता सफल चलचित्रको सिक्वेल बन्ने गरेको छ। सुपर मारियो ब्रदर्समा खलनायकको भूमिका निर्वाह गरेका ज्याक ब्ल्याकले भने, “बाउजर फर्किने निश्चित छैन। मैले केही कुङ फु पाण्डा चलचित्रहरू गरिसकेको छु र प्रत्येक चलचित्रमा फरक फरक भिलेन थिए। यो चलचित्रमा पनि त्यस्तै हुन सक्छ। यसमा पहिले भन्दा धेरै शक्तिशाली खलनायक पनि हुन सक्छ।”
प्रकाशित: २० बैशाख २०८०, बुधबार
