मेटाका सीईओ मार्क जुकरबर्गको सुरक्षा गर्न १ अर्ब ८४ करोड रुपैयाँ खर्च हुने

काठमाडौं ।

फेसबुकको मालिक कम्पनी मेटा प्लेटफर्म्स इंकले आफ्ना सीईओ तथा सह-संस्थापक मार्क जुकरबर्गको सुरक्षा खर्च रकम ४० लाख डलरले बढाएर अब १ करोड ४० लाख डलर (अर्थात करिब १ अर्ब ८४ करोड रुपैयाँ) पुर्याएको छ। कम्पनीले यसलाई ‘न्यायिक र आवश्यक’ भएको भनेको छ। यो रकम उनी र उनको परिवारको सुरक्षाका लागि वार्षिक योजनाअनुसार खर्च गरिनेछ।

३८ वर्षिय जुकरबर्ग हाल फोर्ब्सको सूचीमा ६३ अर्ब डलरभन्दा बढीको कुल सम्पत्तिका साथ १६ औं स्थानमा छन्। सन् २०२१ मा उनलाई २७ मिलियन डलर क्षतिपूर्ति दिइएको थियो । उनको सन् २०२२ को लागि क्षतिपूर्ति जानकारी अझै खुलासा गरिएको छैन।

“यो वृद्धि भत्ता, जुकरबर्गको विद्यमान समग्र सुरक्षा कार्यक्रमको लागतसँगै, परिस्थितिमा उपयुक्त र आवश्यक छ,” मेटाले फाइलिङमा भन्यो।

कम्पनीले आगामी साता थप कर्मचारी हटाउने तयारी गरिरहेको अवस्थामा उनको सुरक्षा भत्ता बढाउने निर्णय गरेको हो। मेटाले गएको नोभेम्बरमा ११ हजार कर्मचारीलाई बर्खास्त गरेको थियो। कम्पनीको १८ वर्षको इतिहासमा पहिलो पटक यति ठूलो संख्यामा कर्मचारी कटौती गरिएको हो।

मार्क जुकरबर्गले गलत निर्णयका कारण राजस्वमा गिरावट आएको बताएका थिए।

मार्कले भनेका थिए, ‘म मेटाको इतिहासमा गरिएका केही कठिन निर्णयहरूको बारेमा बताउन गइरहेको छु। हामीले हाम्रो टोलीको आकार लगभग १३ प्रतिशत घटाउने निर्णय गरेका छौं। जसका कारण ११ हजारभन्दा बढी प्रतिभाशाली कर्मचारीले जागिर गुमाउने छन्। हामीले खर्च घटाएर र क्यू वान मार्फत हायरिङ फ्रिज विस्तार गरेर अझ प्रभावकारी कम्पनी बन्न कदम चालिरहेका छौं।”

मार्क जुकरबर्गले पनि प्रभावित कर्मचारीहरुप्रति खेद प्रकट गर्दै निर्णयको पूर्ण जिम्मेवारी लिएका छन् र कम्पनी कसरी यो स्थानमा पुग्यो भन्ने पनि बताए । “म यी निर्णयहरूको लागि जवाफदेहिता लिन चाहन्छु र हामी कसरी यहाँ आएका छौं,” उनले भने। मलाई थाहा छ यो सबैको लागि गाह्रो छ र म विशेष गरी मेरो निर्णयबाट प्रभावित भएकाहरूका लागि माफी चाहन्छु।

जुकरबर्गले सन् २००४ मा हार्वर्डको आफ्नो छात्रावासमा फेसबुक स्थापना गरेका थिए। साइटको लागि मूल विचार एक सामाजिक सञ्जाल बनाउनु थियो जसले हार्वर्ड विद्यार्थीहरू एकअर्कासँग अनलाइनमा सम्पर्क हुन सकुन्। यद्यपि, साइटले चाँडै लोकप्रियता प्राप्त गर्यो र अन्य विश्वविद्यालयहरूमा विस्तार भयो। अब यो २.९ बिलियन दैनिक सक्रिय प्रयोगकर्ताहरुका साथमा एक वैश्विक प्लेटफर्म भएको छ।

मार्क जुकरबर्ग फेसबुकको स्थापनाकालदेखि नै सीईओका रुपमा रहेका छन्।