काठमाडौं ।
अटोमोबाइलदेखि सफ्टवेयरसम्मका व्यवसायसँग आबद्ध भारतीय व्यवसायीक ग्रुप टाटा समूहले दक्षिण भारतमा आईफोन एसेम्बली प्लान्ट किन्न बोली लगाएको छ। यसमा सफल भएमा टाटा समूहले भारतलाई इलेक्ट्रोनिक्स उत्पादनको हब बनाउने योजनामा ठूलो योगदान दिन सक्छ। यो प्लान्ट एप्पलका लागि कन्ट्र्याक्ट म्यानुफ्याक्चरिङ गर्ने विस्ट्रोनको हो।
एक मिडिया अन्तर्वार्तामा, देशको सबैभन्दा ठूलो सफ्टवेयर कम्पनी टाटा कन्सल्टेन्सी सर्भिस (टीसीएस) का प्रमुख अपरेटिङ अफिसर एन गणपथी सुब्रमण्यमले भने, “म यसमा प्रत्यक्ष संलग्न छैन तर यो वास्तवमै भारतको लागि उत्कृष्ट हुनुपर्दछ। भारतमा इलेक्ट्रोनिक्स र माइक्रोइलेक्ट्रोनिक्सको निर्माण गर्न एक मौका हो।”
टाटा समूहले यो प्लान्ट किन्न विस्ट्रोनसँग विगत केही महिनादेखि वार्ता गरिरहेको छ। यो प्लान्ट बैंगलोर नजिक छ। टाटा समूहले विगत केही वर्षदेखि प्राविधिक क्षेत्रमा आफ्नो उपस्थिति बढाउँदै आएको छ।
भारतको केन्द्र सरकारले इलेक्ट्रोनिक्स उत्पादनमा चीनको प्रभुत्वलाई रोक्न केही कदम चालेको छ। एप्पलले गत वर्ष अप्रिलदेखि डिसेम्बरसम्म भारतबाट २.५ अर्ब डलरभन्दा बढी मूल्यका आईफोन निर्यात गरेको थियो। यो अघिल्लो वर्ष भारतबाट कम्पनीको कुल निर्यातको झण्डै दोब्बर हो । एप्पलले चीनमा कठिनाइहरूका कारण आफ्ना उपकरणहरूको उत्पादनको शिफ्टलाई गति दिइरहेको यसले संकेत गर्छ।
चालु आर्थिक वर्षको पहिलो नौ महिनामा ठेक्कामा उत्पादन गर्ने कम्पनी फक्सकन र विस्ट्रोनले प्रत्येक एक अर्ब डलरभन्दा बढीको डिभाइस भारतबाट निर्यात गरेका छन् । गत वर्षको अन्त्यमा चीनको फक्सकनको कारखानामा कामदारको तोडफोड र कोरोनाका कारण लगाइएका प्रतिबन्धका कारण आईफोनको उत्पादन नराम्ररी प्रभावित भएको थियो । यसपछि एप्पलले उत्पादनको केही हिस्सा चीनबाट सार्ने योजनामा तीव्र गतिमा काम गरेको छ ।
विश्वको सबैभन्दा मूल्यवान कम्पनी एप्पलले गत वर्ष भारतमा आफ्नो नयाँ आईफोन सिरिजका केही मोडलहरू एसेम्बल गर्न थालेको थियो। केन्द्रीय सरकारले उत्पादन-लिङ्क्ड इन्सेन्टिभ (पीएलआई) योजना अन्तर्गत गत वर्षको अन्त्यमा दुई कम्पनीहरू फक्सकन र प्याजेट इलेक्ट्रोनिक्सका लागि प्रोत्साहन स्वीकृत गरेको छ।
प्रकाशित: २७ पुष २०७९, बुधबार
