काठमाडौं ।
यो वर्ष भारतमा चाडपर्वमा स्मार्टफोनले बिक्रीको रेकर्ड कायम गरेको छ। बेंगलुरुस्थित अनुसन्धान फर्म रेडसियरले चाडपर्वको पहिलो हप्तामा भारतका अनलाइन प्लेटफर्महरुमा प्रत्येक मिनेट १.५ करोड भारतीय रुपैयाँका स्मार्टफोन बिक्री भएको बताएको छ।
किफायती मूल्य र नयाँ लन्च गरिएका मोडेलहरूका कारण अक्टोबर १५-२१ सम्ममा चाडपर्वको कुल बिक्रीको ४७ प्रतिशत स्मार्टफोन वर्गले ओगटेको छ।
रेडसियर कन्सल्टिङका निर्देशक मृगांक गुटगुटियाले धेरै पक्षहरूमा यो भारतीय ई-कमर्स क्षेत्रको लागि पहिलो पर्व भएको र यसले भविष्यको लागि बलियो आधार सिर्जना गर्ने बताए।
रिपोर्टहरूका अनुसार, शाओमी भारतले गत हप्ता बताएअनुसार उसले अमेजन, फ्लिपकार्ट र एमआई डटकम जस्ता प्लेटफर्महरूमा ७-दिनको उत्सव सेलमा ५० लाख ह्यान्डसेटहरू बेचेको छ। शाओमीको स्वतन्त्र ब्रान्ड पोकोले पनि चाडपर्वको समयमा फ्लिपकार्टमा १० लाखभन्दा बढी स्मार्टफोन बेचेको छ।
तर, फेस्टिभ सेलमा यसपटक फेसन वर्ग ‘फेड’ भयो । गत वर्षको विपरीत, यो वर्गले सेलमा धेरै योगदान गर्न सकेन। फेसन वर्गको बिक्री १४ प्रतिशत मात्रै रह्यो । प्रतिवेदनले घर र घरेलु फर्निसिङको विधामा राम्रो नतिजा आएको जनाएको छ। घरबाट काम गर्ने र घरबाट अध्ययन गर्ने कुराको माग बढी थियो।
मानिसहरूले प्रिमियम स्मार्टफोनहरू पनि हर्षोल्लासका साथ किनेका छन् जसले गर्दा यस खण्डमा ३.२ गुणा वृद्धि भएको छ। यस श्रेणीका अधिकांश उपकरणहरू एप्पल, गुगल र सामसङबाट खरिद गरिएका थिए, जसले भारतीय उपभोक्ताहरूले अझै पनि चिनियाँ ब्रान्डका प्रिमियम उपकरणहरूमा विश्वास गर्न नसकेको देखाउँछ।
चाडपर्वको मौसममा प्रायः सबै स्मार्टफोन ब्राण्डले आफ्ना नयाँ उत्पादनहरू ल्याएका छन्। अधिकांश उपकरणहरू प्रत्यक्ष रूपमा अनलाइन बिक्रीको लागि लन्च गरिएको थियो। जसका कारण चाडपर्व सेलमा स्मार्टफोनको अत्यधिक बिक्री भएको थियो ।
यद्यपि, अनलाइन बिक्रीमा स्मार्टफोनको बलियो बिक्रीको नोक्सान अफलाइन खुद्रा विक्रेताहरूले भोग्न सक्छन्। सामाजिक सञ्जालमा धेरै पसलहरूले अफलाइन उत्पादन किन्न अपील गरिरहेका थिए। अनलाइन बिक्रीका कारण उनीहरूले पीडा भोग्नुपरेको समाचारमा उल्लेख छ।
प्रकाशित: १६ कार्तिक २०७९, बुधबार
