काठमाडौं ।
चिनियाँ ई-कमर्स जायन्ट जेडी डटकमका अर्बपति संस्थापक रिचर्ड लिउले प्रमुख कार्यकारी अधिकृत (सीईओ)को पदबाट राजीनामा दिएका छन्। उनी यससँगै उच्च-प्रोफाइल टेक मालिकहरूको एक समूहमा सामेल भएका छन् जसले उनीहरूले सुरु गरेका कम्पनीहरूमा आफ्नो भूमिका त्यागेका छन्।
बेइजिङले आफ्नो घरेलु टेक्नोलोजी क्षेत्रमा नियमनलाई कडा बनाउन र कम्पनीहरूको व्यवसायिक अभ्यासहरूको छानबिन गरिरहँदा यो राजीनामा आएको सीएनबीसीले रिपोर्ट गरेको छ।
जेडी डट कमका अध्यक्ष झु लेई अब सीईओको रूपमा पदभार ग्रहण गर्नेछन् र तत्काल प्रभावबाट कम्पनीको निर्देशक बोर्डमा सामेल हुनेछन्।
पछिल्लो सात महिनामा जेडी डट कमको लागि यो दोस्रो व्यवस्थापन फेरबदल हो। सेप्टेम्बरमा, जेडी डट कमको खुद्रा व्यवसायको प्रमुखको रूपमा आफ्नो भूमिका छोडेर सुलाई अध्यक्ष नियुक्त गरिएको थियो। लिउ कम्पनीको बोर्डको अध्यक्षको रूपमा रहनेछन्।
लिउले २०१८ मा बलात्कारको आरोप लागेदेखि जेडी डट कममा उनी धेरै पर्दा पछाडि रहँदै आएका छन्, जुन आरोपलाई उनले अस्वीकार गरेका छन्।
बेइजिङले एन्टिट्रस्टदेखि डाटा सुरक्षासम्मका क्षेत्रमा नियमन कडा पार्न खोजेको छ र आफ्ना नियमहरू उल्लङ्घन गर्ने कम्पनीहरूलाई दण्डित गरेको छ।
तर अहिलेसम्म, यसको प्रतिद्वन्द्वी अलिबाबाको विपरीत जेडी डट कम कुनै पनि प्रमुख नियामक कारबाहीबाट बचेको छ। अलिबाबालाई २.८ अर्ब डलरको एन्टि-मोनोपोली जरिवाना लगाइएको थियो।
लिउले कम्पनीको दीर्घकालीन रणनीतिहरूलाई मार्गदर्शन गर्ने, युवा व्यवस्थापनलाई मार्गदर्शन गर्ने र ग्रामीण क्षेत्रको पुनरुत्थानमा योगदान पुर्याउने जेडी डट कमले भनेको छ।
प्रकाशित: २८ चैत्र २०७८, सोमबार
