अस्ट्रेलियाली नागरिकमा एआईप्रति बढ्दो चिन्ता, दुई तिहाइले जोखिम फाइदाभन्दा बढी देखे
काठमाडौं ।
कृत्रिम बुद्धिमत्ता (एआई) प्रविधिको तीव्र विकासले विश्वभर नयाँ सम्भावना र अवसर सिर्जना गरिरहेको भए पनि अस्ट्रेलियाली नागरिकमा यसप्रति चिन्ता बढ्दै गएको एक सर्वेक्षणले देखाएको छ। अधिकांश अस्ट्रेलियाली नागरिकले एआईबाट हुने सम्भावित जोखिम समाजले प्राप्त गर्ने फाइदाभन्दा बढी रहेको विश्वास गरेका छन्।
अस्ट्रेलियाको अग्रणी स्वतन्त्र अनुसन्धान संस्था लोवी इन्स्टिच्युटले गरेको सर्वेक्षणअनुसार ६५ प्रतिशत उत्तरदाताले एआईका सम्भावित जोखिम समाजका लागि यसबाट प्राप्त हुने सम्भावित लाभभन्दा बढी रहेको बताएका छन्। सन् २०२६ को मार्चमा यस्तो धारणा राख्ने नागरिकको संख्या ६४ प्रतिशत थियो भने सन् २०२४ मा यो संख्या ५२ प्रतिशत मात्र रहेको थियो।
पछिल्लो तथ्यांकले एआई प्रविधिको विस्तारसँगै अस्ट्रेलियाली नागरिकमा यसले समाजमा पार्न सक्ने नकारात्मक प्रभावप्रति चिन्ता बढ्दै गएको देखाएको छ। विशेषगरी रोजगारी, आर्थिक सुरक्षा र भविष्यमा मानव श्रमको भूमिकालाई लिएर नागरिकहरू बढी संवेदनशील बनेका छन्।
यसअघि सन् २०२६ मा अमेरिकास्थित प्यु रिसर्च सेन्टरले ३० भन्दा बढी देशका नागरिकलाई समेटेर गरेको छुट्टै सर्वेक्षणले पनि अस्ट्रेलियालीहरू एआईप्रति बढी चिन्तित रहेको देखाएको थियो।
उक्त सर्वेक्षणअनुसार एआईको बढ्दो प्रयोगले आफूहरूलाई उत्साहित बनाएको भन्दा बढी चिन्तित बनाएको बताउने देशहरूमध्ये अस्ट्रेलिया अगाडि रहेको थियो। यसले प्रविधिको विकासप्रति नागरिकको धारणा केवल नयाँ अवसर र सुविधामा मात्र सीमित नरहेको स्पष्ट पारेको छ।
प्यु रिसर्च सेन्टरको सर्वेक्षणले अर्को महत्त्वपूर्ण तथ्य पनि सार्वजनिक गरेको छ। सर्वेक्षणमा सहभागी ७६ प्रतिशत अस्ट्रेलियाली नागरिकले आगामी २० वर्षभित्र एआईका कारण रोजगारीका अवसर घट्ने विश्वास व्यक्त गरेका छन्।
एआईले विभिन्न क्षेत्रमा काम गर्ने तरिका परिवर्तन गर्न सक्ने र कतिपय काममा मानव श्रमको आवश्यकता कम हुन सक्ने चिन्ता नागरिकमा रहेको यसले संकेत गर्छ।
पछिल्लो समय एआईको प्रयोग शिक्षा, स्वास्थ्य, सञ्चार, उद्योग, व्यापार तथा सेवा क्षेत्रमा तीव्र रूपमा विस्तार भइरहेको छ। यसले कामलाई सहज, छिटो र प्रभावकारी बनाउन सहयोग पुर्याउने अपेक्षा गरिए पनि रोजगारी विस्थापन, आर्थिक असमानता तथा सामाजिक प्रभावबारे बहस बढिरहेको छ।
लोवी इन्स्टिच्युटको सर्वेक्षणमा एआईका जोखिमलाई बढी देख्ने नागरिकको संख्या दुई वर्षको अवधिमा उल्लेख्य रूपमा बढ्नुले प्रविधिको विकाससँगै त्यसको सुरक्षित र जिम्मेवार प्रयोग सुनिश्चित गर्नुपर्ने आवश्यकतालाई पनि उजागर गरेको छ।–रासस