काठमाडौं ।
एप्पलले स्मार्ट डिस्प्लेसहित स्मार्ट होम उपकरणहरूको नयाँ शृङ्खला सार्वजनिक गर्ने तयारी गरेको छ।
एप्पलले अक्टोबर १३ मा शरद ऋतुको दोस्रो कार्यक्रम आयोजना गर्दैछ। निमन्त्रणापत्रमा राखिएको ‘वेलकम होम’ नाराले यो कार्यक्रम स्मार्ट होम उत्पादनमा केन्द्रित हुने संकेत गर्छ।
एप्पल टीभी, होमकिट वा पहिलो होमपड सार्वजनिक गर्दादेखि नै कम्पनीको स्मार्ट होम क्षेत्रमा प्रवेश भएको मान्न सकिन्छ। तर, यसपटकको नयाँ योजनामा सुधारिएको सिरी कृत्रिम बुद्धिमता र त्यसलाई सञ्चालन गर्ने नयाँ हार्डवेयर समावेश हुने बताइएको छ।
इन्ग्याजेटका अनुसार नयाँ हार्डवेयरमध्ये प्रमुख उत्पादन कम्पनीको पहिलो स्मार्ट डिस्प्ले हुने अपेक्षा गरिएको छ। यससँगै एप्पल टीभी र होमपड मिनीका नयाँ संस्करण पनि सार्वजनिक हुन सक्छन्। यसबाहेक अन्य धेरै उत्पादन घोषणा हुन सक्ने सम्भावना छ। एप्पलको स्मार्ट होम कार्यक्रममा सार्वजनिक हुन सक्ने नयाँ उत्पादन यी हुन सक्छन्:
एप्पलको स्मार्ट डिस्प्ले वा ‘होमप्याड’
हालै सार्वजनिक भएका विभिन्न रिपोर्टले एप्पल आफ्नो पहिलो स्मार्ट डिस्प्ले सार्वजनिक गर्न तयार रहेको संकेत गरेका छन्। यो उपकरणमा होमपडको ध्वनि र कृत्रिम बुद्धिमतामा आधारित सहायकका सुविधा हुनेछन्। साथै, यसमा फोटो देखाउन, एप सञ्चालन गर्न र फेसटाइमका लागि छुट्टै उपकरणका रूपमा प्रयोग गर्न मिल्ने डिस्प्ले हुनेछ।
ब्लुमबर्गका अनुसार एप्पलको कथित ‘होमप्याड’ मा ६ इन्चको वर्गाकार डिस्प्ले हुनेछ। यो होमपड मिनीजस्तै गोलाकार स्पिकरसँग जोडिएको वा भित्तामा डिस्प्लेसँगै जडान गर्न मिल्ने सानो ध्वनि प्रणालीसहित उपलब्ध हुनेछ।
होमप्याडसँग अन्तरक्रिया गर्ने मुख्य माध्यम सिरी कृत्रिम बुद्धिमता हुनेछ। तर, टीभीओएसमा आधारित नयाँ ‘होमओएस’ ले टचस्क्रिनमार्फत पनि उपकरण सञ्चालन गर्न दिनेछ। यसमा एप्पल वाच र आईफोनको स्ट्यान्डबाइ मोडमा उपलब्ध केही अनुकूलन गर्न मिल्ने इन्टरफेस सुविधा पनि समावेश हुनेछन्।
ब्लुमबर्गका अनुसार स्मार्ट डिस्प्लेमा आईप्याडओएस शैलीका एप पनि सञ्चालन गर्न सकिनेछ। विकासकर्ताले समर्थन गरेमा यसले भिडियो स्ट्रिमिङलगायतका अन्य सुविधा उपलब्ध गराउन सक्नेछ।
सिरी कृत्रिम बुद्धिमताले एप्पलको होमकिट प्लेटफर्मसँग कसरी अन्तरक्रिया गर्न सक्छ भन्ने देखाउनुका साथै एप्पलले यो उपकरणलाई स्क्रिन हेरिरहेको व्यक्ति पहिचान गर्न र त्यसअनुसार इन्टरफेस तथा एप परिवर्तन गर्न सक्ने बनाउने योजना बनाएको बताइएको छ। तर, यसका लागि आईफोनमा प्रयोग हुने एप्पलको फेस आईडी प्रविधि प्रयोग नगरिने जनाइएको छ।
यो सुविधाले स्क्रिन हेर्ने व्यक्तिअनुसार होमप्याडमा देखाइने पात्रो वा सूचनाहरू परिवर्तन गर्न सक्नेछ। एप्पलका अन्य केही उपकरणमा मात्र उपलब्ध यस्ता व्यक्तिगत अनुकूलन सुविधाले स्मार्ट डिस्प्लेलाई फरक बनाउन सक्छन्।
होमपड मिनी र एप्पल टीभीमा नयाँ सुविधा
एप्पलले सिरीको एआईमा पहुँचलाई उपकरणमा प्रयोग गरिएको ए सिरिज वा एम सिरिज चिपका आधारमा सीमित गरेको छ। त्यसैले हालको होमपड मिनीमा रहेको पुरानो एस५ चिप र एप्पल टीभी ४केमा रहेको ए१५ बायोनिक चिपलाई नयाँ चिपले प्रतिस्थापन गर्नुपर्ने देखिन्छ। एस५ चिप एप्पल वाच सिरिज ५ मा प्रयोग गरिएको थियो भने ए१५ बायोनिक चिप आईफोन १३ मा प्रयोग गरिएको थियो।
ब्लुमबर्गका अनुसार एप्पल टीभी ४के र होमपड मिनी दुवैमा सिरी कृत्रिम बुद्धिमता सञ्चालन गर्न सक्ने तीव्र गतिको नयाँ चिप प्रयोग गरिनेछ। साथै, डिजाइनमा सामान्य परिवर्तन पनि गरिनेछ।
नयाँ एप्पल टीभी ४केमा आईफोन १७ शृङ्खलामा प्रयोग गरिएको कम्तीमा ए१९ चिप रहने र यसको रिमोटमा पनि केही परिवर्तन गरिने बताइएको छ।
म्याक रुमर्सका अनुसार होमपड मिनी हरियो, गुलाबी, नीलो, कालो र सेतोसहितका नयाँ रङमा उपलब्ध हुनेछ। यसमा हालैका एप्पल वाचमा प्रयोग गरिएको चिप राखिने सम्भावना छ, जसले सिरी कृत्रिम बुद्धिमतासम्बन्धी अनुरोध सञ्चालन गर्न सक्नेछ।
एप्पलले होमपड प्रयोग गरेर सराउन्ड साउन्ड प्रणालीलाई समर्थन गर्ने सुविधामा पनि काम गरिरहेको बताइएको छ। यो सुविधा हाल एप्पल टीभीमार्फत उपलब्ध स्टेरियो होमपड प्रणालीको विस्तार हुनेछ।
तेस्रो पक्षका डोरबेल, लक र क्यामेरा
यसअघि सार्वजनिक भएका रिपोर्टमा एप्पलले आफ्नो स्मार्ट होम उत्पादनअन्तर्गत गोपनीयतामा केन्द्रित क्यामेरा विकास गरिरहेको उल्लेख थियो। तर, ब्लुमबर्गको पछिल्लो रिपोर्टअनुसार ती उपकरण एप्पलकै नाममा बिक्री नहुन सक्छन्।
कम्पनीले एलजी इलेक्ट्रोनिक्ससँग मिलेर स्मार्ट लक, डोरबेल, थर्मोस्ट्याट र तापक्रम मापन गर्ने सेन्सरको शृङ्खला तयार पारिरहेको बताइएको छ। यी उपकरण एप्पलको स्मार्ट होम प्रणालीसँग काम गर्नेछन्। तर, तिनको उत्पादन, बिक्री र सेवाको जिम्मेवारी एलजीले नै लिने इन्ग्याजेटले जनाएको छ।
पछि सार्वजनिक भएको अर्को जानकारीअनुसार यस्तै तेस्रो पक्षका उपकरण स्नाइडर इलेक्ट्रिकले पनि उत्पादन गर्नेछ। कम्पनीले एप्पलको स्मार्ट होम उत्पादन सार्वजनिक हुने समयमा प्रयोगका लागि थर्मोस्ट्याट तयार पारिरहेको बताइएको छ।
यसको अर्थ एप्पलले भविष्यमा आफ्नै नाममा यस्ता उपकरण सार्वजनिक गर्न सक्दैन भन्ने होइन। तर, होमकिटको नयाँ चरणका लागि डिजाइन गरिएका पहिलो सहायक उपकरण एप्पलले आफैँ उत्पादन नगर्ने संकेत भने यसले गर्छ।
एप्पलको ठूलो बजार र पहुँचले अन्य स्मार्ट होम उपकरण निर्मातालाई चुनौती दिन सक्ने भएकाले तेस्रो पक्षका कम्पनीसँग सहकार्य गर्ने निर्णय उपयुक्त हुन सक्नेछ।
प्रकाशित: २४ आश्विन २०८३, शनिबार
