काठमाडौं ।
दक्षिण कोरियाले यस वर्षको पहिलो कक्षीय मिसन सफलतापूर्वक प्रक्षेपण गरेको छ। यो उपलब्धि मंगलबार राति (अक्टोबर ६) हासिल भएको हो। दक्षिण कोरियाले आफ्नै प्रविधिमा निर्माण गरेको नुरी रकेट नारो स्पेस सेन्टरबाट प्रक्षेपण गरिएको थियो। रकेटले १५ वटा स्याटेलाइट बोकेको थियो।
रकेट नेपाली समयअनुसार बुधबार बिहान ८ बजेर १० मिनेटमा प्रक्षेपण भएको थियो। प्रक्षेपणपछि लगभग सबै काम योजनाअनुसार भयो। सरकारी कोरिया एयरोस्पेस रिसर्च इन्स्टिच्युट (केएआरआई) का अनुसार एउटा बाहेक सबै पेलोड योजनाअनुसार तल्लो पृथ्वी कक्षमा पुर्याइयो।
तीमध्ये पाँचवटा स्याटेलाइट दक्षिण कोरियाको नयाँ ‘न्यु-स्पेस अर्थ अब्जर्भेसन स्याटेलाइट कन्स्टेलेसन फर नेसनल सेफ्टी’ (निओनस्याट) नेटवर्कका माइक्रोस्याटेलाइट हुन्।
दक्षिण कोरियाली समाचार एजेन्सी योनहापका अनुसार प्रत्येक निओनस्याटको तौल १०० किलोग्रामभन्दा कम छ। यी स्याटेलाइटमा विद्युतीय–अप्टिकल क्यामरा जडान गरिएको छ, जसले कालो–सेतो तस्बिरमा १ मिटर र रंगीन तस्बिरमा ४ मिटरसम्मका वस्तु पहिचान गर्न सक्छ।
स्पेस डटकमका अनुसार यी स्याटेलाइटले राष्ट्रिय सुरक्षा र विपद् व्यवस्थापनका लागि कोरियाली प्रायद्वीप तथा वरपरका क्षेत्रको निगरानी गर्नेछन्।
यो प्रक्षेपणअघि दुईवटा निओनस्याट स्याटेलाइट अन्तरिक्षमा पठाइसकिएको थियो। दुवै स्याटेलाइट रकेट ल्याबको इलेक्ट्रोन रकेटमार्फत प्रक्षेपण गरिएका थिए। पहिलो सन् २०२४ को अप्रिलमा र दोस्रो यसै वर्षको जनवरीमा प्रक्षेपण गरिएको थियो। योनहापका अनुसार थप पाँचवटा स्याटेलाइट अर्को वर्ष नुरी रकेटमार्फत प्रक्षेपण गरिनेछन्। त्यसपछि निओनस्याट नेटवर्क पूरा हुनेछ।
मंगलबार राति प्रक्षेपण गरिएका अन्य १० वटा स्याटेलाइट क्युबस्याट हुन्। यी विभिन्न संस्थाले उपलब्ध गराएका थिए। तीमध्ये दक्षिण कोरियाली कम्पनी क्वाटर्नियनले निर्माण गरेको पर्स्याट०२ भने प्रक्षेपण गर्न असफल भयो। प्रक्षेपण भएको करिब दुई घण्टापछि केएआरआईले पर्स्याट०२ तैनाथ हुन नसकेको जानकारी दिएको थियो।
४७ मिटर अग्लो नुरी रकेटलाई केएसएलभी-२ (कोरियन स्पेस लन्च भेहिकल-२) पनि भनिन्छ। यो दक्षिण कोरियाले पूर्ण रूपमा आफ्नै प्रविधिमा निर्माण गरेको पहिलो कक्षीय प्रक्षेपण रकेट हो। यसको सञ्चालन केएआरआई र हान्वा एयरोस्पेसले संयुक्त रूपमा गर्छन्।
तीन चरणको यो रकेट सन् २०२१ को अक्टोबरमा भएको पहिलो प्रक्षेपणमा असफल भएको थियो। तर अहिले नुरी लगातार चारवटा सफल प्रक्षेपणको अवस्थामा पुगेको छ।
“पाँचौँ प्रक्षेपणमार्फत एउटै प्रक्षेपणमा धेरै स्याटेलाइटलाई कक्षमा सटीक रूपमा तैनाथ गरेर अन्तरिक्ष यातायात मिसन सञ्चालन गर्ने नुरी रकेटको क्षमता अझ बढाएका छौं,” केएआरआईले जनाएको छ। “नुरी रकेटको सफल उडानप्रति देखाउनुभएको चासो र सहयोगका लागि हामी सबै नागरिकलाई हार्दिक धन्यवाद दिन्छौं।” रासस/सिन्ह्वा
प्रकाशित: २२ आश्विन २०८३, बिहीबार
