काठमाडौं ।
क्वालकमले मंगलबार अमेजनले दीर्घकालीन साझेदारीअन्तर्गत ६० अर्ब डलरसम्मको एआई डाटा सेन्टर चिप र सम्बन्धित उत्पादन खरिद गर्न सक्ने जनाएको छ। यसले एआई पूर्वाधारको प्रमुख आपूर्तिकर्ता बन्न क्वालकमको प्रयासलाई बलियो बनाएको छ।
सम्झौताअन्तर्गत क्वालकमले करिब ४ अर्ब डलर मूल्यका वारन्ट उपलब्ध गराउनेछ। नियामकीय विवरणअनुसार उत्पादन खरिदसँगै यी वारन्ट लागू हुनेछन् र अमेजनलाई प्रतिकित्ता १६१.२६ डलरका दरले क्वालकमको सेयर खरिद गर्ने अधिकार दिनेछन्। क्यालिफोर्नियाको सान डिएगोस्थित क्वालकमको सेयर मूल्य ३ प्रतिशतभन्दा बढी बढेको थियो।
यो सम्झौता स्मार्टफोन क्षेत्रभन्दा बाहिर आफ्नो व्यवसाय विस्तार गर्ने क्वालकमको प्रयासले गति लिइरहेको पछिल्लो संकेत हो। कम्पनीले एप्पलको मोडेम व्यवसाय गुमाउने सम्भावना, बढ्दो कम्पोनेन्ट लागत र कमजोर ह्यान्डसेट मागको सामना गरिरहेको छ।
क्वालकमले गत एक वर्षदेखि क्लाउड सेवा प्रदायकलाई कस्टम एआई चिप र डेटा सेन्टर प्रविधि उपलब्ध गराउन प्रयास गर्दै आएको छ। यी कम्पनीहरू एआईका लागि एनभिडियाको प्रभावशाली प्रोसेसरको विकल्प खोजिरहेका छन्।
इन्ग्याजेटका अनुसार अमेजनसँगै माइक्रोसफ्ट र मेटा पनि क्वालकमको यो प्रयासका ग्राहक बनेका छन्। क्वालकमले यी सम्झौताले सन् २०२९ सम्म डाटा सेन्टर चिपबाट हुने आम्दानी १५ अर्ब डलरसम्म पुर्याउन सहयोग गर्ने अपेक्षा गरेको छ।
“यो ठ्याक्कै त्यस्तो प्रकारको विकास हो, जसले क्वालकमले आफ्नो महत्वाकांक्षी डेटा सेन्टर लक्ष्य पूरा गर्न सक्छ भन्नेमा बजारलाई विश्वस्त पार्न आवश्यक थियो,” टेकनालाइसिस रिसर्चका प्रमुख विश्लेषक बब ओ’डोनेलले भने।
यो साझेदारी अल्फाबेटको गुगलसँग मार्भेल टेक्नोलोजीले यस्तै कस्टम एआई चिप सम्झौता गरेको केही सातापछि भएको हो। उक्त सम्झौताले गुगललाई १२.२ अर्ब डलरसम्म मूल्यको मार्भेल सेयर खरिद गर्ने अधिकार दिएको थियो।
मंगलबार भएको सम्झौताअन्तर्गत क्वालकम र अमेजनले एआई इन्फरेन्सका लागि चिप विकासमा सहकार्य गर्नेछन्। एआई इन्फरेन्स भनेको तालिम दिइसकिएका एआई मोडल सञ्चालन गर्ने प्रक्रिया हो। यो बजार तीव्र रूपमा विस्तार भइरहेको छ र सेमिकन्डक्टर कम्पनीबीच महत्वपूर्ण प्रतिस्पर्धाको क्षेत्र बनेको छ।
यसैबीच, अमेजनको कस्टम चिप व्यवसाय उसको क्लाउड इकाइका लागि वृद्धि गर्ने प्रमुख क्षेत्र बनेको छ। जुन त्रैमासिकको अन्त्यसम्म यस व्यवसायको वार्षिक आधारमा अनुमान गरिएको आम्दानी २५ अर्ब डलरभन्दा बढी पुगेको थियो।
कम्प्युटिङ चिपबाहेक सम्झौतामा क्वालकमको अप्टिकल कम्युनिकेसन प्रविधि पनि समावेश छ। एआई डाटा सेन्टरमा बढ्दो ब्यान्डविथ आवश्यकता पूरा गर्न दुवै कम्पनीले १.६ टेराबिट प्रतिसेकेन्डसम्मको उच्च गतिको अप्टिकल कनेक्टिभिटी प्रविधि विकास गर्नेछन्।
गत वर्ष २.४ अर्ब डलरमा अल्फावेभ खरिद गरेपछि क्वालकमका लागि अप्टिकल प्रविधि तुलनात्मक रूपमा नयाँ व्यवसाय हो। उक्त खरिदपछि अल्फावेभका प्रमुख कार्यकारी टोनी पियालिस क्वालकमको डेटा सेन्टर चिप व्यवसायको प्रमुख बनेका थिए।
“कम्प्युट र अप्टिकल इन्टरकनेक्ट दुवैलाई समावेश गरेर क्वालकमले एआई पूर्वाधारमा आफूले विशेष रूपमा उपलब्ध गराउन सक्ने सेमिकन्डक्टर प्रविधिको दायरा देखाएको छ,” ओ’डोनेलले भने।
यस साझेदारीअन्तर्गत क्वालकमले चिप डिजाइनसम्बन्धी कामका लागि AWS का सेवा र पूर्वाधारको प्रयोग पनि बढाउने योजना बनाएको छ। यसबाट चिप विकासको समय छोट्याउने कम्पनीको लक्ष्य छ
प्रकाशित: २५ भाद्र २०८३, बिहीबार
