काठमाडौं ।
सीजी एमएडब्लु इभोलुसन प्राइभेट लिमिटेडले नाडा अटो शो २०२६ को पहिलो दिन नेपालमा नयाँ अवतार ०७ औपचारिक रूपमा सार्वजनिक गरेको छ।
कम्पनी ‘स्मार्ट एलिगेन्स, एफर्टलेस लक्जरी’ अर्थात् स्मार्ट सौन्दर्य र सहज विलासिताको अवधारणामा तयार गरिएको अवतार ०७ ले विशिष्ट डिजाइन, बौद्धिक प्रविधि, परिष्कृत आराम र विद्युतीय कार्यक्षमतालाई एउटै सवारीसाधनमा समेटेको छ। यो मोडल नेपालका लागि अवतार सवारीसाधनको आधिकारिक वितरक सीजी एमएडब्लु इभोलुसन प्राइभेट लिमिटेडले सार्वजनिक गरेको हो।
यो प्रिमियम विद्युतीय एसयूभीमा ८२.१६ किलोवाट आवर क्षमताको एलएफपी ब्याट्री जडान गरिएको छ। कम्पनीका अनुसार यसले एनईडीसी परीक्षण मापदण्डअनुसार एकपटकको पूर्ण चार्जमा अधिकतम ५७५ किलोमिटरसम्मको रेन्ज प्रदान गर्छ। यसको रियर–ह्विल–ड्राइभ पावरट्रेनले १९० किलोवाट अधिकतम पावर र ३६५ एनएम टर्क उत्पादन गर्छ। यसले गाडीलाई ७.७ सेकेन्डमा शून्यदेखि १०० किलोमिटर प्रतिघण्टाको गति लिन सक्षम बनाउँछ।
अवतार ०७ को प्रविधिमैत्री र विलासी क्याबिनमा ३५.४ इन्चको फोर–के पानोरामिक डिस्प्ले, १५.६ इन्चको सेन्ट्रल टचस्क्रिन, नाप्पा लेदर अपहोल्स्ट्री, ६४ रङको एम्बियन्ट लाइटिङ र १६ वटा स्पिकरसहितको पायोनियर अडियो सिस्टम उपलब्ध छन्।
यसका अन्य प्रमुख विशेषतामा जिरो–ग्राभिटी फ्रन्ट सिट, सिट भेन्टिलेसन तथा हिटिङ, मसाज सुविधा, वायरलेस एप्पल कारप्ले र एन्ड्रोइड अटो तथा ५० वाटको वायरलेस स्मार्टफोन चार्जर समावेश छन्।
नेपालमा अवतार ०७ को अधिकतम खुद्रा मूल्य २ करोड २० लाख रुपैयाँ निर्धारण गरिएको छ भने एफएचडीसहितको अवतार ०७ को मूल्य २ करोड ३० लाख तोकिएको छ।
प्रकाशित: १० भाद्र २०८३, बुधबार
