काठमाडौं ।
ओपनएआईले १८ वर्षभन्दा कम उमेरका प्रयोगकर्ताका लागि ‘च्याटजीपीटी फर टीन्स’ नामको विशेष संस्करण सार्वजनिक गरेको छ।
नयाँ संस्करणको उद्देश्य किशोरका लागि सुरक्षित वातावरण बनाउनु र अभिभावकलाई थप नियन्त्रण दिनु रहेको छ। यो प्रणाली १३ देखि १७ वर्ष उमेरका प्रयोगकर्ताका लागि तयार गरिएको बताइएको छ।
१८ वर्षभन्दा कम उमेरका प्रयोगकर्तालाई स्वतः किशोरका लागि तयार गरिएको च्याटजीपीटीमा लगिनेछ। १८ वर्षभन्दा माथिका प्रयोगकर्ताले भने च्याटजीपीटीको सामान्य संस्करण प्रयोग गर्न पाउनेछन्।
टेलिग्राफका अनुसार उमेर निर्धारण प्रयोगकर्ताले खाता बनाउँदा उपलब्ध गराएको विवरणबाट सुरु हुन्छ। तर ओपनएआईले प्रयोगकर्ता १८ वर्षभन्दा कम उमेरको हो कि होइन भनेर अनुमान गर्ने प्रणाली पनि विकास गरेको छ।
यस मोडलले प्लेटफर्म कसरी प्रयोग भइरहेको छ, खाता कति समयदेखि प्रयोगमा छ र प्रयोगकर्ता कुन समयमा सक्रिय हुन्छ भन्नेलगायतका विभिन्न संकेतलाई ध्यानमा राख्छ।
मुख्य परिवर्तनमध्ये एक च्याटजीपीटीले विद्यार्थीलाई विद्यालयको काममा सहयोग गर्ने तरिकासँग सम्बन्धित छ।
किशोरले सिधै तयार उत्तर मागेमा प्रणालीले उसलाई ‘स्टडी मोड’ प्रयोग गर्न सुझाव दिन सक्छ। यो सुविधाले तत्काल उत्तर दिनुभन्दा विद्यार्थीलाई समस्या बुझ्न र चरणबद्ध रूपमा समाधान गर्न सहयोग गर्ने उद्देश्य राख्छ।
‘च्याटजीपीटी फर टीन्स’ मा उमेरअनुसार उपयुक्त नभएको सामग्रीका लागि थप कडा सुरक्षा व्यवस्था पनि गरिएको छ। कम्पनीका अनुसार नाबालिग प्रयोगकर्ताका लागि जोखिमपूर्ण हुन सक्ने विषयमा थप प्रतिबन्ध लगाइएको छ।
कानुनी रूपमा निश्चित उमेर पुगेपछि मात्र प्रयोग गर्न पाइने वस्तु वा सेवा प्राप्त गर्न किशोरलाई सहयोग नगर्ने गरी पनि प्रणाली तयार गरिएको छ।
हिंसा तथा अन्य स्पष्ट वा अनुपयुक्त सामग्रीसँग सम्बन्धित विषयमा पनि थप कडा सुरक्षा व्यवस्था गरिएको छ।
नयाँ संस्करणमा प्रयोगकर्तालाई केही समय विश्राम लिन सुझाव दिने सूचना पनि समावेश गरिएको छ। च्याटजीपीटीले किशोरलाई केही समय प्लेटफर्मबाट टाढा रहन र निरन्तर च्याटबट प्रयोग नगर्न सम्झाउन सक्छ।
ओपनएआईका अनुसार प्रणालीले प्रयोगकर्तालाई आफू वास्तविक व्यक्ति नभई एआईसँग कुराकानी गरिरहेको कुरा नियमित रूपमा सम्झाउनेछ।
किशोरहरूले च्याटबटलाई विद्यालयको कामका लागि मात्र नभई कुराकानी र भर्चुअल सामाजिक गतिविधिका लागि पनि प्रयोग गरिरहेका बेला यो व्यवस्था महत्वपूर्ण मानिएको छ।
युवा पुस्तामा एआईको प्रयोगले पार्न सक्ने प्रभावबारे अभिभावक र विज्ञहरूले चिन्ता व्यक्त गरिरहेका बेला यो विकास भएको हो। ओपनएआईले गत वर्ष च्याटजीपीटीको सुरक्षा अभ्यासलाई लिएर अनुसन्धान र कानुनी समस्याको पनि सामना गरेको थियो।
नयाँ उपायले नाबालिग प्रयोगकर्तालाई उनीहरूको विकासका लागि हानिकारक वा अनुपयुक्त सामग्रीको सम्पर्कमा आउनबाट कम गर्न उद्देश्य राखेको छ।
तर, प्रयोगकर्ताले गलत उमेरको विवरण दिएमा उमेर प्रमाणीकरण र अनुमान गर्ने प्रणाली कति प्रभावकारी हुन्छ भन्ने कुरा भने हेर्न बाँकी छ।
‘च्याटजीपीटी फर टिन्स’ मार्फत ओपनएआईले १३ देखि १७ वर्ष उमेरका प्रयोगकर्ताको शैक्षिक र सुरक्षा आवश्यकतालाई ध्यानमा राखेर विशेष एआई अनुभव प्रदान गर्ने लक्ष्य राखेको छ।
प्रकाशित: १० भाद्र २०८३, बुधबार
