अटो टेक

अटो शोको ठूलो हिस्सा गाडी वर्षौंसम्म चलाइराख्ने उद्योगले ओगटेको छ र त्यो पनि देखिनुपर्छ -नाडाका अध्यक्ष सुरेन्द्र उप्रेती

अटो शोको ठूलो हिस्सा गाडी वर्षौंसम्म चलाइराख्ने उद्योगले ओगटेको छ र त्यो पनि देखिनुपर्छ -नाडाका अध्यक्ष सुरेन्द्र उप्रेती
Global IME Bank

यहि भदौ ९ गतेदेखि भृकुटीमण्डपमा सुरु हुने ‘एचपी ल्युब्रिकेन्ट्स प्रिजेन्ट्स १८औं नाडा अटो शो २०२६’ करिब तीन लाख वर्गफिट क्षेत्रफलमा दुई सय भन्दा बढी स्टल सहित सञ्चालन हुनेछ। यसमा २३ यात्रुवाहक, १७ हल्का व्यावसायिक र १३ दुईपाङ्ग्रे गरी ५३ सवारी ब्राण्ड सहभागी हुनेछन्।

तर सहभागीको बहुमत भने तिनै होइनन्। प्रदर्शनी स्थलमा रहने करिब ७० कम्पनीले चलाएर लैजान मिल्ने कुनै वस्तु बेच्दैनन् । तिनले टायर, ब्याट्री, इन्जिन आयल, हेलमेट, बेयरिङ, ग्यास्केट, फिल्टर, डाइग्नोस्टिक उपकरण, ग्यारेज टुल्स, जीपीएस तथा टेलिमेटिक्स प्रणाली, एसेसरिज र इभी चार्जिङ उपकरण उपलब्ध गराउँछन्।

करिब १० बैंक, वित्तीय संस्था र बीमा कम्पनी अटो लोन तथा सवारी बीमा विद्युतीय सवारीका लागि छुट्टै वित्तीय योजनासहित लिएर उपस्थित हुनेछन्।

अटोमोबाइल उद्योगको यही हिस्सासँग नेपाली उपभोक्ता एक दशकसम्म जोडिन्छन् तर यही हिस्सा प्रदर्शनीमा देखिने अवसर लगभग कहिल्यै आउँदैन।

गाडी छान्न तीन हप्ता लाग्छ, तर छानेको निर्णयसँगै दस वर्ष बाँच्नुपर्छ। ती तीन हप्ता सोरुममा बित्छन् । ती दसवर्ष वर्कसप, बैंक, बीमा कार्यालय र टायर पसलमा बित्छन् ।

प्रदर्शनीलाई चारपाङ्ग्रे, दुईपाङ्ग्रे, वित्तीय संस्था, अटो पार्ट्स र ग्यारेज उपकरण गरी छुट्टाछुट्टै क्षेत्रमा विभाजन गरिएको छ ताकि पहिलो प्रश्नसँगै दोस्रो प्रश्न पनि एउटै भ्रमणमा सोध्न सकियोस्।

सहभागी सवारी ब्राण्डको भौगोलिक विविधता पनि उल्लेखनीय छ — युरोपेली इन्जिनियरिङ सहितको स्कोडा, मलेसियाको राष्ट्रिय ब्राण्ड प्रोटोन, र चेरी (ओमोडा तथा जेकु) एवं जीडब्ल्यूएम लगायत चिनियाँ निर्माता। जापानी, भारतीय, कोरियाली, चेक, मलेसियाली र चिनियाँ मूलका सवारीसाधन एकअर्काबाट केही पाइला टाढा उभिनेछन्।

विदेशी सहभागीका लागि इन्टरनेसनल बिजनेस प्याभिलियन र स्वदेशी उत्पादन तथा एसेम्बलीका लागि ‘मेड इन नेपाल/मेड फर नेपाल’ प्याभिलियन छुट्याइएको छ।

“अटो शो भन्नेबित्तिकै गाडीले भरिएको हल भन्ने लाग्छ। तर हाम्रो प्रदर्शनीको ठूलो हिस्सा त ती गाडी वर्षौंसम्म चलाइराख्ने उद्योगले ओगटेको छ। त्यो उद्योग पनि देखिनुपर्छ,” नाडाका अध्यक्ष सुरेन्द्र कुमार उप्रेतीले भने।

पचास वर्षअघि नेपालको अटोमोबाइल उद्योगको प्रदर्शनी एउटा कोठामै अटाउँथ्यो। आज त्यसलाई तीन लाख वर्गफिट चाहिनुको कारण गाडी बढेर मात्र होइन उद्योग नै बढेकाले हो।

Sajilo Visa
easy care