काठमाडौं ।
नेपाल क्रिकेट संघ (क्यान) ले नेपाल प्रिमियर लिग (एनपीएल) २०२६ का विभिन्न व्यावसायिक अधिकार बिक्रीका लागि बोलपत्र आह्वान गरेको छ।
क्यानले शुक्रबार सार्वजनिक गरेको सूचनामार्फत एनपीएल २०२६ का ओटीटी स्ट्रिमिङ, टिकटिङ र टेलिभिजन प्रसारण अधिकार बिक्री गर्न सिलबन्दी बोलपत्र आह्वान गरेको हो।
क्यानका अनुसार एनपीएल २०२६ का लागि भारतबाहेक विश्वभरको एक्सक्लुसिभ ओटीटी स्ट्रिमिङ अधिकार बिक्री गरिनेछ। यसअन्तर्गत भारतको भूभागबाहेक अन्य क्षेत्रका लागि एनपीएलको ओटीटी प्लेटफर्ममार्फत प्रत्यक्ष प्रसारण गर्ने अधिकार प्रदान गरिनेछ।
त्यस्तै एनपीएल २०२६ का लागि एक्सक्लुसिभ टिकटिङ अधिकार समेत बिक्री गरिने भएको छ। प्रतियोगिताका टिकट बिक्री तथा त्यससँग सम्बन्धित अधिकार लिन इच्छुक कम्पनी तथा संस्थाले बोलपत्र प्रक्रियामा सहभागी हुन सक्नेछन्।
क्यानले एनपीएल २०२६ को नेपाल क्षेत्रका लागि लीनियर टेलिभिजन अर्थात् परम्परागत टेलिभिजन प्रसारण अधिकार पनि बिक्री गर्ने जनाएको छ। यसले नेपालमा एनपीएलका खेल टेलिभिजनमार्फत प्रसारण गर्ने अधिकार छुट्टै व्यावसायिक प्रक्रियाबाट प्रदान गर्नेछ।
क्यानले राष्ट्रिय प्रतिस्पर्धात्मक बोलपत्रअन्तर्गत ‘सिंगल स्टेज, सिंगल इनभेलप’ प्रक्रियाबाट यी तीनवटै अधिकार बिक्री गर्न लागेको हो। बोलपत्रसम्बन्धी सम्झौता नम्बर क्रमशः CAN/BID/01/083-084, CAN/BID/02/083-084 र CAN/BID/03/083-084 रहेका छन्।
बोलपत्रमा सहभागी हुन योग्य इच्छुक कम्पनी तथा संस्थाले क्यानको मुलपानीस्थित कार्यालयबाट बोलपत्रसम्बन्धी कागजात खरिद गर्न सक्नेछन्। त्यसका लागि लिखित आवेदनसँगै कम्पनी/फर्म दर्ता प्रमाणपत्रको प्रतिलिपि पेश गर्नुपर्नेछ। बोलपत्र कागजातका लागि १० हजार रुपैयाँ गैरफिर्ती शुल्क तोकिएको छ।
क्यानले बोलपत्र कागजात ३ सेप्टेम्बर २०२६ सम्म कार्यालय समयमा खरिद गर्न सकिने जनाएको छ। सिलबन्दी बोलपत्र भने ४ सेप्टेम्बर २०२६ दिउँसो १२ बजेसम्म क्यानको मुलपानीस्थित कार्यालयमा स्वयं वा कुरियरमार्फत बुझाइसक्नुपर्नेछ। निर्धारित समयपछि प्राप्त हुने बोलपत्र स्वीकार नगरिने क्यानले जनाएको छ।
एनपीएलको ओटीटी, टिकटिङ र टेलिभिजन प्रसारण अधिकारलाई छुट्टाछुट्टै बिक्रीमा राख्दै क्यानले प्रतियोगिताको व्यावसायिक मूल्य अधिकतम बनाउने प्रयास गरेको देखिन्छ। विशेषगरी भारतबाहेक विश्वभरको ओटीटी अधिकार छुट्टै बिक्रीमा राखिनुले एनपीएललाई नेपाली क्रिकेटको घरेलु बजारसँगै अन्तर्राष्ट्रिय डिजिटल दर्शकमाझ विस्तार गर्ने सम्भावना बढाएको छ।
थप विवरण क्यानको आधिकारिक वेबसाइटबाट प्राप्त गर्न सकिनेछ।
प्रकाशित: २९ श्रावण २०८३, शुक्रबार
