काठमाडौं ।
अमेरिकी टेलिकम कम्पनी टी–मोबाइलले निजी लगानी कम्पनी ग्रेन म्यानेजमेन्टसँग ८०० मेगाहर्ज स्पेक्ट्रम पोर्टफोलियो बिक्रीसम्बन्धी कारोबार पूरा गरेको जनाएको छ।
सम्झौताअनुसार टी–मोबाइलले आफ्नो ८०० मेगाहर्ज स्पेक्ट्रम हस्तान्तरण गरेको छ। त्यसको बदलामा कम्पनीले २ अर्ब ९० करोड अमेरिकी डलर नगद र ग्रेनका सबै ६०० मेगाहर्ज स्पेक्ट्रम लाइसेन्स प्राप्त गरेको छ।
यस साता टी–मोबाइलले सार्वजनिक गरेको जानकारीमा सम्झौताबारे धेरै विवरण छैन। तर दुवै पक्षबीचको सैद्धान्तिक सहमति गत वर्ष मार्चमा घोषणा गरिएको थियो। त्यसबेला टी–मोबाइलका स्पेक्ट्रम, साझेदारी तथा अधिग्रहणसम्बन्धी वरिष्ठ उपाध्यक्ष डिर्क मोसाले सम्झौताका सर्तबाट कम्पनी सन्तुष्ट रहेको बताएका थिए।
उनका अनुसार यो सम्झौताले टी–मोबाइललाई ग्रेनजस्ता प्रमुख साझेदारसँग सहकार्य गर्ने अवसर दिनेछ। उदीयमान प्रविधिले महत्वपूर्ण पूर्वाधार र सञ्चारलाई कसरी सहयोग गर्न सक्छ भन्ने सम्भावनाको खोजी गर्दै उपभोक्ताका लागि स्पेक्ट्रमको अधिकतम उपयोग गर्ने दुवै कम्पनीको समान दृष्टिकोण रहेको उनले बताएका थिए।
सम्झौताले ग्रेनको ६०० मेगाहर्ज स्पेक्ट्रम पोर्टफोलियोलाई टी–मोबाइलको नेटवर्कमा प्रयोग गर्ने अवसर पनि दिने उनले बताएका थिए। यो स्पेक्ट्रमले विभिन्न बजारमा ग्राहकको अनुभव सुधार्न सहयोग गरिरहेको कम्पनीको भनाइ थियो।
यस सम्झौताले अमेरिकी संघीय सञ्चार आयोग (एफसीसी) बाट गत जुलाई १ मा नियामकीय स्वीकृति पाएको थियो।
टेलिकम्स डटकमका अनुसार ग्रेन म्यानेजमेन्ट सञ्चार पूर्वाधार र प्रविधि कम्पनीमा लगानी गर्ने निजी लगानी कम्पनी हो। कम्पनीको वेबसाइटअनुसार यसले १२ अर्ब अमेरिकी डलरको सम्पत्ति व्यवस्थापन गर्छ र ११ वटा लगानी माध्यम सञ्चालन गर्छ।
यस साता कारोबार पूरा भएको विषयमा जारी आफ्नै विज्ञप्तिमा ग्रेनले यो अधिग्रहणपछि आफू अमेरिकाका सबैभन्दा ठूला निजी स्वामित्वमा रहेका लो-ब्यान्ड स्पेक्ट्रम पोर्टफोलियोमध्ये एकको मालिक बनेको जनाएको छ।
यसले महत्वपूर्ण उद्योगलाई सेवा दिने र अमेरिकाको कनेक्टिभिटी बलियो बनाउने सञ्चार पूर्वाधारमा लगानी गर्ने आफ्नो दीर्घकालीन रणनीतिलाई पनि अघि बढाएको कम्पनीले जनाएको छ।
ग्रेनले ८०० मेगाहर्ज ब्यान्ड २६ स्पेक्ट्रमलाई दुर्लभ लो-ब्यान्ड सम्पत्तिका रूपमा वर्णन गरेको छ। यसले अमेरिकाभर करिब १४ मेगाहर्जको मिश्रित स्पेक्ट्रम क्षमता उपलब्ध गराउँछ। यसको सिग्नल प्रसारण विशेषताका कारण विद्युत् सेवा प्रदायक तथा अन्य महत्वपूर्ण पूर्वाधार सञ्चालकका निजी वायरलेस नेटवर्क, व्यावसायिक सञ्चार र डाइरेक्ट-टु-डिभाइस (डी२डी) स्याटेलाइट सेवाका लागि यो उपयुक्त हुने कम्पनीले जनाएको छ।
ग्रेन म्यानेजमेन्टका संस्थापक तथा प्रमुख कार्यकारी अधिकृत डेभिड ग्रेनले सञ्चार पूर्वाधार आर्थिक वृद्धि र राष्ट्रिय लचकताको महत्वपूर्ण आधार भएको बताएका छन्। उनका अनुसार यो दीर्घकालीन रणनीतिक महत्व भएको विशिष्ट राष्ट्रिय पूर्वाधार सम्पत्ति हो।
यो स्पेक्ट्रमलाई कनेक्टिभिटी सुधार, महत्वपूर्ण पूर्वाधार सुदृढीकरण र निरन्तर नवप्रवर्तनका लागि उपयोग गर्ने दिशामा काम गर्ने उनले बताएका छन्।
कारोबार पूरा हुनु यो स्पेक्ट्रम सम्पत्तिका लागि नयाँ चरणको सुरुवात भएको पनि ग्रेनले जनाएको छ। अब कम्पनीले जिम्मेवार व्यवस्थापनमा ध्यान दिने र अमेरिकाको सञ्चार पूर्वाधारलाई थप बलियो बनाउने उद्देश्यले उद्योगका विभिन्न पक्षसँग सहकार्य गर्ने जनाएको छ।
ग्रेनका अनुसार अब उसले ८०० मेगाहर्ज स्पेक्ट्रम पोर्टफोलियोसम्बन्धी आफ्नो रणनीति कार्यान्वयन सुरु गर्नेछ। यसमा सम्भावित व्यावसायिक साझेदारसँग छलफल गर्ने र एफसीसीले तय गरेको ढाँचाअनुसार स्पेक्ट्रम प्रयोगका विभिन्न विकल्प अघि बढाउने काम समावेश हुनेछ।
केही साताअघि टी–मोबाइलको प्रतिस्पर्धी अमेरिकी टेलिकम कम्पनी एटीएन्डटीले पनि इकोस्टारबाट २३ अर्ब अमेरिकी डलरमा मोबाइल स्पेक्ट्रम खरिद पूरा गरेको थियो।
३.४५ गिगाहर्जको ३० मेगाहर्ज र ६०० मेगाहर्जको २० मेगाहर्ज स्पेक्ट्रमले अमेरिकाभर आफ्नो मोबाइल सेवाको क्षमता र कभरेज बढाउन सहयोग गर्ने एटीएन्डटीको अपेक्षा छ।
उक्त कारोबारले इकोस्टारलाई ठूलो मात्रामा नगद उपलब्ध गराएको छ। कम्पनीको अर्को व्यावसायिक इकाइले पनि टाट पल्टिएको घोषणा लागि आवेदन दिन सक्ने अवस्थामा रहेको टेलिकम्स डटकमले जनाएको छ।
प्रकाशित: २८ श्रावण २०८३, बिहीबार
