काठमाडौं ।
टेक्सासको पेकोस काउन्टीमा प्रस्तावित डेटा सेन्टरका लागि अमेजनले आफ्नै विद्युत् उत्पादन केन्द्रमा लगानी गरिरहेको छ। द न्युयोर्क टाइम्सका अनुसार यो विद्युत् केन्द्र अमेरिकामा जलवायु प्रदूषणको सबैभन्दा ठूलो स्रोत बन्न सक्नेछ।
द न्युयोर्क टाइम्सका अनुसार उक्त विद्युत् केन्द्रले प्राकृतिक ग्यास जलाउनेछ र यसबाट वार्षिक ३ करोड ३० लाख टन कार्बन डाइअक्साइड उत्सर्जन गर्न अनुमति दिइएको छ। यो मात्रा अमेरिकाका अन्य कुनै पनि विद्युत् केन्द्रको भन्दा बढी हो।
अमेजनका एक प्रवक्ताले विज्ञप्तिमार्फत डाटा सेन्टर “टेक्सासका परिवारको विद्युत् लागत नबढ्ने गरी नयाँ साइटमै उत्पादन हुने विद्युत्बाट सञ्चालन गरिने” पुष्टि गरेका छन्। डाटा सेन्टरका कारण विद्युत् लागतमा पर्ने प्रभावलगायत विभिन्न कारणले यस्ता परियोजनाले बढ्दो राजनीतिक विरोधको सामना गरिरहेका छन्।
टेकक्रञ्चका अनुसार एआईले अमेजनको कार्बन उत्सर्जनमा यसअघि नै ठूलो प्रभाव पारेको छ। कम्पनीले गत वर्ष आफ्नो कार्बन उत्सर्जन १६ प्रतिशतले बढेको जनाएको थियो। सन् २०४० सम्म कार्बन उत्सर्जन अन्त्य गर्ने प्रतिबद्धता जनाएको कम्पनीका लागि यो गलत दिशातर्फको प्रगति हो।
अमेजन र अन्य प्रविधि कम्पनीहरूले अत्यधिक विद्युत् खपत गर्ने आफ्ना डेटा सेन्टरलाई ऊर्जा उपलब्ध गराउन ठूला प्राकृतिक ग्यास विद्युत् केन्द्रको विकासलाई समर्थन गरिरहेकाले यो अवस्था अझ खराब हुन सक्नेछ।
अमेजनका प्रवक्ताले भने, “हामीले जलवायु प्रतिबद्धता सुरु गर्दा संसार अहिलेभन्दा फरक थियो।” उनले कम्पनीको “प्रतिबद्धता भने परिवर्तन नभएको” पनि दावी गरे।
प्रकाशित: २७ श्रावण २०८३, बुधबार
×
