काठमाडौं ।
एआई कम्पनी ओपनएआईले आगामी एस्ट्रा मोडलमा ‘महत्त्वपूर्ण साइबर क्षमता’ हुन सक्ने सम्भावनालाई अस्वीकार गर्न नसकेको बताएको छ।
ठूलो साइबर सुरक्षा घटनापछि ओपनएआईले आफ्नो नयाँ एआई मोडलका लागि सुरक्षा उपाय र नियन्त्रणहरू थप कडा बनाउने घोषणा गरेको हो। ओपनएआईका मोडलहरूले ओपन सोर्स मेसिन लर्निङ प्लेटफर्म हगिङ फेसमा प्रवेश गरेको घटनाको केही समयपछि कम्पनीले यस्तो घोषणा गरेको हो।
इन्ग्याजेटका अनुसार आफ्नो वेबसाइटमा प्रकाशित एक पोस्टमा ओपनएआईले एस्ट्रा नाम दिइएको आगामी मोडलको आन्तरिक परीक्षणमा ‘एजेन्टिक कोडिङ र साइबर सुरक्षामा उल्लेखनीय प्रगति’ देखिएको बताएको छ। त्यसका कारण एस्ट्रामा ‘महत्त्वपूर्ण साइबर क्षमता’ हुन सक्ने सम्भावनालाई अस्वीकार गर्न नसकिएको कम्पनीले जनाएको छ।
ओपनएआईका अनुसार सार्वजनिक नगरिएको एस्ट्रा मोडललाई ‘क्रिटिकल क्यापेबिलिटी लेभल’ मा राख्नुपर्ने हो वा होइन भन्ने विषयमा कम्पनीले निश्चित रूपमा भन्न सक्ने अवस्था छैन।
ओपनएआईको प्रिपेयर्डनेस फ्रेमवर्कअनुसार ‘क्रिटिकल’ स्तरको मोडलले मानिसको हस्तक्षेपबिना विभिन्न सुरक्षा प्रणाली भएका वास्तविक महत्त्वपूर्ण प्रणालीमा सबै स्तरका जोखिम भएका ‘जिरो-डे एक्सप्लोइट’ पहिचान गरी विकास गर्न सक्छ।
यस्तो मोडलले उच्च स्तरको लक्ष्य मात्र दिइएको अवस्थामा पनि कडा सुरक्षा भएका प्रणालीविरुद्ध साइबर आक्रमणका नयाँ रणनीति तयार गरी सुरुदेखि अन्त्यसम्म कार्यान्वयन गर्न सक्ने क्षमता राख्न सक्छ। तर ओपनएआईले एस्ट्रा अझै सार्वजनिक नगरिएको मोडल भएको र हगिङ फेसमा भएको घटनामा यसको संलग्नता नरहेको स्पष्ट पारेको छ।
यी परीक्षणपछि ओपनएआईले समस्यालाई सम्बोधन गर्न केही सावधानीका कदम चालिरहेको छ। कम्पनीले नयाँ आवश्यकताहरू पूरा नगर्ने एस्ट्रासँग सम्बन्धित आन्तरिक गतिविधि रोक्दै ‘कडा सुरक्षा नियन्त्रण’ लागू गर्ने जनाएको छ। ओपनएआईले थप सुरक्षित बनाउन सरकारी निकाय र तेस्रो पक्षका परीक्षण साझेदारसँग पनि काम गर्ने बताएको छ।
परीक्षण वातावरणबाट बाहिर निस्किएर बाह्य संस्थालाई असर पार्ने एआई मोडल ओपनएआईको मात्र होइन। एन्थ्रोपिकले गत महिना प्रकाशित गरेको एक रिपोर्टमा उसका तीनवटा फरक क्लाउड मोडलले इन्टरनेटमा पहुँच बनाएर तीनवटा संस्थाको प्रणालीमा प्रवेश गर्न सफल भएको उल्लेख गरेको थियो। त्यसपछि मुनसटको किमी के३ ले पनि नियन्त्रित परीक्षण वातावरणबाट बाहिर निस्कन सफल भएको थियो।
प्रकाशित: २६ श्रावण २०८३, मंगलवार
