काठमाडौं ।
अमेजन डटकम विरुद्ध शुक्रबार उपभोक्ताहरूले मुद्दा दायर गरेका छन्। उनीहरूले अमेजनले आफ्नो प्लेटफर्ममा बिक्री हुने समुद्री खाद्यका वातावरणीय फाइदाबारे भ्रामक दावी गरेको आरोप लगाएका छन्। यस्तो अभ्यासलाई ‘ग्रीनवासिङ’ भनिन्छ।
सियाटलको संघीय अदालतमा दायर गरिएको प्रस्तावित सामूहिक मुद्दामा उपभोक्ताहरूले “डल्फिन–सुरक्षित”, “जिम्मेवार रूपमा प्राप्त”, “दिगो”, “जङ्गलबाट समातिएको” र “एमएससी प्रमाणित दिगो समुद्री खाद्य” जस्ता लेबलले अमेजनबाट बिक्री हुने समुद्री खाद्यको स्रोतले समुद्र र वातावरणमा अत्यन्तै कम हानि पुर्याउँछ भन्ने गलत विश्वास दिलाएको बताएका छन्।
उपभोक्ताहरूका अनुसार यस्ता दाबी पुष्टि नभएका वा महत्वपूर्ण रूपमा गलत छन्। अधिकांश माछा मार्ने जहाजको सार्वजनिक रूपमा निगरानी हुँदैन र केही जहाजले आफ्नो स्थान लुकाउन ‘ट्रान्सपोन्डर’ भनिने विद्युतीय उपकरण बन्द गर्ने गर्छन्। साथै, आयात गरिने जङ्गली समुद्री खाद्यको कम्तीमा पाँचमध्ये एक भाग जिम्मेवार वा दिगो तरिकाले प्राप्त गरिएको हुँदैन भन्ने उनीहरूको दाबी छ।
“यति हुँदाहुँदै पनि अमेजनले उपभोक्ता झुक्किन नदिन आवश्यक जानकारी नदिई व्यापक रूपमा दिगोपनको सन्देश प्रयोग गरेर यी ‘ग्रीनवासिङ’ गरिएका समुद्री खाद्यको प्रचार गरिरहेको छ,” मुद्दामा भनिएको छ।
मुख्य कार्यकारी अधिकृत एन्डी ज्यासीले अप्रिल २९ मा विश्लेषकहरूसँगको सम्मेलनमा दिएको जानकारीअनुसार सियाटलस्थित अमेजन सन् २०२५ मा १५० अर्ब डलरभन्दा बढीको कुल बिक्रीसहित अमेरिकाको दोस्रो ठूलो किराना बिक्रेता बनेको छ।
अमेजन र अन्य उपभोक्ता सामूहिक मुद्दामा कम्पनीको पक्षमा बहस गर्ने वकिलहरूले यस विषयमा तत्काल कुनै प्रतिक्रिया दिएका छैनन्।
अमेजनले आफ्नो प्लेटफर्ममा बिक्री हुने, बाह्य विक्रेताका उत्पादनसहित, विभिन्न वस्तुका विषयमा बारम्बार मुद्दाहरूको सामना गर्दै आएको छ।
यस मुद्दामा बम्बल बी, चिकेन अफ द सी, स्टारकिस्ट तथा अमेजनको आफ्नै ‘३६५ बाइ होल फुड्स मार्केट’ ब्रान्डअन्तर्गतका टुना, साल्मन र अन्य धेरै समुद्री खाद्य उत्पादन समेटिएका छन्।
लस एन्जलसकी मेडेलिन रोगो र शिकागोका एडम सोर्किनको नेतृत्वमा रहेका मुद्दाकर्ताहरूले अमेजनले समुद्री खाद्यको “वास्तविक दिगोपनको अवस्था” खुलाएको भए आफूहरूले ती उत्पादन किन्ने थिएनन् वा कम मूल्य मात्र तिर्ने थिए भन्ने बताएका छन्।
मुद्दामा वासिङ्टन राज्यको उपभोक्ता संरक्षण कानुन उल्लङ्घन गरेको आरोप लगाउँदै अमेरिकाभरका उपभोक्ताका लागि क्षतिपूर्ति, अतिरिक्त हर्जाना तथा रकम फिर्ताको माग गरिएको छ।
बम्बल बी, चिकेन अफ द सी र स्टारकिस्टका मूल कम्पनीहरू क्रमशः ताइवानको एफसीएफ, थाइल्यान्डको थाई युनियन ग्रुप र दक्षिण कोरियाको डोङवोन इन्डस्ट्रिज भने शुक्रबार दायर गरिएको यस मुद्दाका प्रतिवादी होइनन्।
प्रकाशित: १७ श्रावण २०८३, आईतवार
