काठमाडौं ।
गुगलले विभिन्न उमेर समूहअनुसार एपका सुविधा मिलाउन सहयोग गर्ने नयाँ प्ले एज सिग्नल्स एपीआई विश्वभर विस्तार गर्ने घोषणा गरेको छ।
यदि प्रयोगकर्ताले गुगल प्लेबाट डाउनलोड गरेको कुनै एपसँग आफ्नो उमेर समूह साझा गर्न सहमति दिएको खण्डमा उक्त एपीआईले एप विकासकर्तालाई त्यसबारे जानकारी दिन्छ। त्यसपछि विकासकर्ताले प्रयोगकर्ताको उमेरअनुसार एपका सुविधा र अनुभव मिलाउन सक्छन्।
ठूला बालबालिका र वयस्कले प्रत्येक एपका लागि छुट्टाछुट्टै आफ्नो उमेर समूह साझा गर्न सक्नेछन्। साना बालबालिकाको हकमा भने अभिभावकले गुगल फ्यामिली लिंक एपमार्फत उनीहरूको उमेर समूह साझा गर्न सक्नेछन्।
त्यसपछि उक्त एपीआई प्रयोग गर्ने सबै एपमा यो सुविधा स्वतः लागू हुनेछ। यसले अभिभावकले प्रत्येक एप अलग–अलग रूपमा सेटअप गर्नुपर्ने झन्झट हटाउने गुगलको भनाइ छ।
प्रयोगकर्ताले आफ्नो ठ्याक्कै उमेर नभई केवल उमेर समूह मात्र साझा गर्ने भएकाले एप विकासकर्ताले राहदानी, सवारी चालक अनुमतिपत्र वा अन्य परिचयपत्रजस्ता संवेदनशील कागजात सुरक्षित राख्न वा प्रशोधन गर्नुपर्ने आवश्यकता पर्दैन।
गुगल प्लेका उत्पादन व्यवस्थापन उपाध्यक्ष पाउल फेङले प्रयोगकर्तालाई सुरक्षित अनलाइन अनुभव दिनु र उनीहरूलाई हानिबाट जोगाउनु गुगल प्लेको प्रमुख प्राथमिकता भएको बताए।
उनका अनुसार गुगलले आफ्ना प्लेटफर्ममा आधारभूत सुरक्षा व्यवस्था निरन्तर सुधार गरिरहेको छ। साथै, अभिभावकलाई आफ्ना बालबालिकाका लागि उचित निर्णय गर्न आवश्यक उपकरण उपलब्ध गराउनुका साथै एप विकासकर्तालाई पनि उमेरअनुसार उपयुक्त अनुभव दिन सक्ने क्षमता प्रदान गर्न चाहेको उनले बताए।
गुगलका अनुसार एपीआई कसरी प्रयोग गर्ने वा उमेरअनुसारका सुरक्षा सुविधा लागू गर्ने कि नगर्ने भन्ने निर्णय विकासकर्ताकै हुनेछ।
फेङले मौसमसम्बन्धी एपलाई मनोरञ्जन वा सामाजिक सञ्जाल एपजत्तिकै कडा सुरक्षा व्यवस्था आवश्यक नपर्ने भन्दै सबै एपमा एउटै नियम लागू गर्नुको सट्टा विकासकर्तालाई आवश्यकताअनुसार लचकता दिइएको बताए।
टेलिकम्स डटकमका अनुसार यो एपीआई हाल ब्राजिलमा उपलब्ध छ। गुगलले अब यसलाई विश्वभरका सबै प्ले स्टोर विकासकर्ताका लागि उपलब्ध गराउने जनाएको छ। यसको सुरुवात अगस्टको मध्यदेखि अस्ट्रेलिया र क्यानडाबाट हुनेछ भने यस वर्षको अन्त्यसम्म विश्वव्यापी रूपमा विस्तार गरिने योजना छ।
यो एपीआई गुगल प्लेको उमेर प्रमाणीकरण प्रणालीको पूरक सुविधा हो। यस वर्ष सुरु गरिएको उक्त प्रणालीमार्फत प्रयोगकर्ताले परिचयपत्र, बैंक कार्डको तस्बिर अपलोड गरेर वा सेल्फी खिचेर आफ्नो उमेर प्रमाणित गर्न सक्छन्।
यी नयाँ सुविधालाई विश्वभरका सरकारले बालबालिकालाई इन्टरनेटका अनुपयुक्त सामग्रीबाट जोगाउन कानुनी व्यवस्था कडा बनाइरहेको वर्तमान प्रवृत्तिसँग जोडेर हेरिएको छ।
बेलायतको सञ्चार नियामक अफकमले गुगलको यो घोषणालाई सकारात्मक रूपमा हेर्ने अपेक्षा गरिएको छ। अफकमले अर्को वर्षदेखि १६ वर्षमुनिका बालबालिकाका लागि सामाजिक सञ्जालसम्बन्धी नयाँ नियम लागू गर्ने तयारी गरिरहेको छ र यस वर्ष गुगललाई यस विषयमा पटक–पटक सचेत गराएको थियो।
गत मार्चमा अफकमले यूट्युबसहितका सामाजिक सञ्जाललाई न्यूनतम उमेरसम्बन्धी नियम प्रभावकारी रूपमा लागू गर्न निर्देशन दिएको थियो। मे महिनामा पनि उसले यूट्युब र टिकटकले बालबालिकाको सुरक्षाका लागि पर्याप्त काम नगरेको आरोप लगाएको थियो।
यसैबीच, एप्पलले भने आफ्ना आईओएस २६.४ अद्यावधिकमार्फत एप्पल अकाउन्ट प्रयोगकर्ताका लागि अपरेटिङ सिस्टम स्तरमै उमेर प्रमाणीकरण सुविधा लागू गरिसकेको छ। उमेर प्रमाणीकरण स्वेच्छिक भए पनि त्यसमा सहभागी नहुने प्रयोगकर्ताका लागि एप्पलको वेब सामग्री फिल्टर र सञ्चार सुरक्षा सुविधा स्वतः सक्रिय हुने व्यवस्था गरिएको छ।
गुगलको प्ले एज सिग्नल्स एपीआई विश्वभर उपलब्ध हुन थालेपछि बालबालिकाको अनलाइन सुरक्षालाई बलियो बनाउने प्रयासमा गुगल पनि अगाडि बढिरहेको रूपमा हेरिएको छ।
प्रकाशित: १७ श्रावण २०८३, आईतवार
