काठमाडौं ।
गुगल डिपमाइन्डले विभिन्न प्रकारका रोबोट नियन्त्रण गर्न सक्ने नयाँ कृत्रिम बुद्धिमत्ता (एआई) प्रणाली जेमिनी रोबोटिक्स २ सार्वजनिक गरेको छ। कम्पनीका अनुसार यो प्रणालीले मानवजस्तै रोबोटलाई फोहोर उठाउने, पानी हाल्ने भाँडा उठाउने, बल्ब जडान गर्ने र फोहोरको झोला बाँध्ने जस्ता काम गर्न सक्षम बनाउँछ।
कम्पनीले जेमिनी रोबोटिक्स २ को प्रदर्शन गर्दै भिडियो पनि सार्वजनिक गरेको छ। भिडियोमा रोबोटले बुमबक्समा क्यासेट राख्ने, बल्ब जडान गर्ने र फोहोरको झोला बाँध्ने काम गरेको देखाइएको छ।
यसअघिको जेमिनी रोबोटिक्स प्रणालीले रोबोटिक हातमार्फत झोला बन्द गर्ने र ओरिगामी कागज मोड्ने जस्ता सूक्ष्म काम गर्न सक्थ्यो। नयाँ संस्करणमा भने रोबोटको सम्पूर्ण शरीरलाई बुद्धिमत्तापूर्वक नियन्त्रण गर्ने क्षमता थपिएको गुगलले जनाएको छ।
गुगलका अनुसार भिडियोमा देखाइएका सबै रोबोट पूर्ण रूपमा स्वायत्त रूपमा वास्तविक समयमा सञ्चालन भएका हुन्। यसलाई कम्पनीले टेस्लाको अप्टिमस रोबोटको प्रदर्शनसँग तुलना गरेको छ, जहाँ पहिले सार्वजनिक गरिएको एक प्रदर्शनमा रोबोटलाई मानिसले टाढाबाट नियन्त्रण गरेको तथ्य बाहिर आएको थियो।
जेमिनी रोबोटिक्स २ मा विभिन्न एआई मोडेल समावेश गरिएको छ, जसले रोबोटलाई आफ्नो वरिपरिको वातावरण बुझ्न मद्दत गर्छ। यसमा एउटा भिजन–ल्याङ्ग्वेज मोडेलले वातावरणको विश्लेषण गर्छ भने दुईवटा भिजन–ल्याङ्ग्वेज–एक्सन मोडेलले रोबोटको शरीर र हातको चाल नियन्त्रण गर्ने इन्ग्याजेटले जनाएको छ।
गुगलले यी रोबोट सबै प्रकारका काम गर्न सक्ने सामान्य प्रयोजनका रोबोट नभएको स्पष्ट पारेको छ। भिडियोमा देखाइएका प्रत्येक कामका लागि मोडेललाई मानवद्वारा सञ्चालन गरिएको उदाहरण, भिडियो नमुना र सिमुलेसनको प्रयोग गरेर विशेष रूपमा प्रशिक्षण दिइएको कम्पनीले जनाएको छ।
गुगल डिपमाइन्डका अनुसार यो प्रविधि भविष्यमा मानिसले गर्न सक्ने जुनसुकै शारीरिक काम गर्न सक्ने रोबोट विकास गर्ने लक्ष्यतर्फको अर्को महत्वपूर्ण कदम हो।
कम्पनीले एआईबाट सञ्चालित रोबोटको सुरक्षालाई प्राथमिकतामा राखिएको पनि जनाएको छ। प्रत्येक एआई तहमा सुरक्षा संयन्त्र राखिएको छ भने एएसआईएमओभी–एजेण्टिक नामको नयाँ मापदण्ड विकास गरिएको छ, जसले कुनै आदेशले हानिकारक परिणाम ल्याउन सक्छ वा सक्दैन भन्ने मूल्याङ्कन गर्नेछ।
गुगल डिपमाइन्डकी रोबोटिक्स प्रमुख क्यारोलिना पाराडाले रोबोटलाई विभिन्न वास्तविक परिस्थितिमा प्रयोग गर्दा धेरै अनिश्चितता हुने भएकाले सुरक्षा विषयलाई अझ गहिराइमा अध्ययन गर्न आवश्यक रहेको बताएकी छन्।
गुगलले उपभोक्ताका लागि यस्ता रोबोट तत्काल बजारमा ल्याउने योजना नरहेको जनाएको छ। अर्कोतर्फ, टेस्लाका प्रमुख कार्यकारी अधिकृत इलन मस्कले आफ्नो कम्पनीको अप्टिमस रोबोटलाई कम्पनीकै सबैभन्दा ठूलो उत्पादन हुने दावी गर्दै यसबाट १० ट्रिलियन अमेरिकी डलरको बिक्री हुने बताएका छन्।
उनले सन् २०२६ सम्म ५० हजारदेखि एक लाखसम्म अप्टिमस रोबोट उत्पादन गर्ने र सन् २०२५ को अन्त्यसम्म उत्पादन केन्द्रहरूमा एक हजार रोबोट सञ्चालनमा ल्याउने बताएका थिए, तर ती लक्ष्य पूरा भएका छैनन्।
प्रकाशित: १६ श्रावण २०८३, शनिबार
