काठमाडौं ।
विश्लेषक संस्था डेल’ओरो ग्रुपको नयाँ प्रतिवेदनअनुसार दूरसञ्चार सेवा प्रदायकहरूले प्रविधि विकासको समान चरणमा तुलना गर्दा ४जी कोर नेटवर्कको तुलनामा फाइभजी स्ट्यान्डअलोन (फाइभजी एसए) मा २०८ प्रतिशत बढी लगानी गरेका छन्।
तर आगामी केही वर्षमा यसको आम्दानी वृद्धिदर सुस्त हुने अपेक्षा गरिएको छ।
प्रतिवेदनका अनुसार फाइभजी स्ट्यान्डअलोन नेटवर्कको जटिलताका कारण बिक्रेताहरूको आम्दानी फोरजीको समान चरणको तुलनामा उल्लेखनीय रूपमा बढेको छ। यद्यपि आगामी दुई वर्षमा फाइभजी मोबाइल कोर नेटवर्कको आम्दानी वृद्धिदर सुस्त हुने अनुमान गरिएको छ।
डेल’ओरोका अनुसार उच्च सर्भर लागतका कारण सेवा प्रदायकहरूले नेटवर्क रूपान्तरणसम्बन्धी परियोजनाहरू स्थगित गरिरहेका छन्।
प्रतिवेदनले आगामी पाँच वर्षमा यूरोप, मध्यपूर्व र अफ्रिका (ईएमईए) क्षेत्रले मोबाइल कोर नेटवर्क बजारको अधिकांश आम्दानी ल्याउने जनाएको छ। साथै फाइभजीले स्थान लिए पनि फोरजी कोर नेटवर्कको आम्दानी गत वर्ष बढेको र यससम्बन्धी पूर्वानुमान पनि संशोधन गरी बढाइएको उल्लेख गरिएको छ।
प्रतिवेदनमा कृत्रिम बुद्धिमत्ता (एआई) ले मोबाइल कोर नेटवर्कमा मिश्रित प्रभाव पार्ने बताइएको छ। एआईले कार्यक्षमता सुधार र नयाँ आम्दानीको अवसर सिर्जना गर्न सक्ने भए पनि लागत बढ्ने जोखिम पनि रहने उल्लेख गरिएको छ।
डेल’ओरो ग्रुपकी वरिष्ठ निर्देशक सियान मोर्गनले थ्रीजीपीपी मापदण्ड विकासको प्रक्रियाले फाइभजी रेडियो पहुँच नेटवर्क (आरएएन) मा भएको लगानी र फाइभजी स्ट्यान्डअलोन कार्यान्वयनबीच समयको अन्तर सिर्जना गरेको बताइन्। उनका अनुसार फाइभजी स्ट्यान्डअलोनको जटिलताले एलटीई इभोल्भ्ड प्याकेट कोर (ईपीसी) को समान चरणको तुलनामा विक्रेताहरूको सञ्चित आम्दानी धेरै बढाएको छ।
उनले अधिकांश मोबाइल सेवा प्रदायकहरूले अझै आफ्ना धेरै ग्राहकका लागि फाइभजी स्ट्यान्डअलोन सेवा उपलब्ध नगराएकाले यसको आम्दानीले अझै उच्च बिन्दु नछोएको बताइन्।
टेलिकम्स डटकमका अनुसार मेमोरी अभावका कारण सर्भरको मूल्य बढेकाले केही सेवा प्रदायकहरूले कोर नेटवर्क रूपान्तरण परियोजना ढिलाइ गरिरहेका भए पनि २०२८ देखि फाइभजी मोबाइल कोर नेटवर्कको आम्दानी दोहोरो अंकको दरमा पुनः बढ्ने अपेक्षा गरिएको उनले बताइन्।
यसअघि यसै वर्ष सार्वजनिक गरिएको डेल’ओरोको अर्को प्रतिवेदनले फाइभजी स्ट्यान्डअलोनले गत वर्ष महत्वपूर्ण मोड पार गरेको र पहिलो पटक कुल मोबाइल कोर नेटवर्क आम्दानीको ५० प्रतिशत हिस्सा फाइभजी कोर नेटवर्कले ओगटेको जनाएको थियो।
त्यस प्रतिवेदनमा मापदण्ड निर्धारण गर्ने संस्था, उपकरण निर्माता र सेवा प्रदायकहरूले नयाँ उत्पादन, अनुप्रयोग र आम्दानीका नयाँ मोडेल विकास गर्न सहकार्य गरिरहेको उल्लेख गरिएको थियो।
यसका उदाहरणका रूपमा उपभोक्ता वेयरेबल र औद्योगिक उपकरणका लागि कम लागतका रेडक्याप रेडियो, नेटवर्क स्लाइसिङ, आईएमएस डेटा च्यानल तथा डेभलपरहरूलाई सबै सेवा प्रदायकका नेटवर्कमा आफ्ना अनुप्रयोग विस्तार गर्न सहयोग गर्ने खुला एपीआईलाई प्रस्तुत गरिएको थियो।
यसैबीच डेल’ओरोले यसै साता सार्वजनिक गरेको अर्को प्रतिवेदनमा फाइभजी नेटवर्क विस्तार आगामी दुई वर्षसम्म निरन्तर बढ्ने र यसले माइक्रोवेभ प्रसारण उपकरणको माग बढाउने उल्लेख गरेको छ।
डेल’ओरो ग्रुपका उपाध्यक्ष जिमी यूका अनुसार पोइन्ट-टु-पोइन्ट माइक्रोवेभ प्रसारण उपकरणको बजार कम्तीमा अझ दुई वर्ष बढ्ने अपेक्षा गरिएको छ। विश्वभर फाइभजी नेटवर्क विस्तार भइरहेकाले यसको मुख्य लाभ यही क्षेत्रमा देखिने उनले बताए।
उनका अनुसार त्यसपछि मोबाइल ब्याकहोल उपकरणको माग घट्न सक्नेछ र सिक्सजी मोबाइल रेडियो नेटवर्क विस्तार सुरु भएपछि मात्रै फेरि वृद्धि हुने सम्भावना छ। फाइभजी जस्तै सुरुआती चरणमा फाइबरमा आधारित ब्याकहोल प्रणालीको प्रयोग बढी हुने र त्यसपछि पुनः माइक्रोवेभ प्रसारण प्रणालीको माग बढ्ने उनले बताए।
प्रतिवेदनले आगामी चार वर्षमा पोइन्ट-टु-पोइन्ट माइक्रोवेभमा बढी निर्भर क्षेत्रहरूमा फाइभजी विस्तारका कारण वायरलेस ब्याकहोलको हिस्सा बढ्ने अनुमान गरेको छ। तर २०३० सम्म प्रारम्भिक ६जी नेटवर्क विस्तार फाइबरमा आधारित सेल साइटलाई प्राथमिकता दिने भएकाले यो प्रवृत्ति उल्टिने अपेक्षा गरिएको छ।
प्रकाशित: १५ श्रावण २०८३, शुक्रबार
