बन्डल अफरले माग बढाएका कारण एटीएन्डटीले पार गर्‍यो नयाँ वायरलेस ग्राहक थप्ने लक्ष्य

एटीएन्डटीले बुधबार सार्वजनिक गरेको त्रैमासिक नतिजाअनुसार सस्तो अनलिमिटेड वायरलेस योजना र मोबाइल तथा ब्रोडब्यान्ड सेवा एउटै अफरमा उपलब्ध गराउने योजनाका कारण नयाँ वायरलेस ग्राहक अपेक्षाभन्दा धेरै थपिएका छन्। यससँगै कम्पनीको सेयर करिब ४ प्रतिशतले बढ्यो।

अमेरिकी दूरसञ्चार कम्पनीहरू सीमित संख्याका ग्राहकका लागि प्रतिस्पर्धा गरिरहेका बेला एटीएन्डटीले एउटै घरपरिवारलाई धेरै प्रकारका कनेक्टिभिटी सेवा बेच्ने रणनीति अपनाएको छ। यसले ग्राहक पलायन घटाउने र दीर्घकालीन आम्दानी बढाउने कम्पनीको विश्वास छ।

यी बन्डल अफरका कारण कम्पनीले ब्रोडब्यान्ड सेवामा पनि अहिलेसम्मकै धेरै नयाँ ग्राहक थपेको छ। यस अवधिमा ३ लाख ६७ हजार नयाँ फाइबर इन्टरनेट ग्राहक र २ लाख ७९ हजार फिक्स्ड वायरलेस ग्राहक थपिएका छन्।

एटीएन्डटीले मार्चमा ‘वनकनेक्ट’ सेवा सुरु गरेको थियो, जसमा अनलिमिटेड वायरलेस सेवा र घरको इन्टरनेट एउटै मासिक बिलमा उपलब्ध हुन्छ।

रोयटर्सका अनुसार कम्पनीले ‘बिल्ड–ए–प्लान’ नामक आफूअनुसार योजना छनोट गर्न मिल्ने सुविधा र बढी हाई–स्पिड डाटा भएका नयाँ प्रवेशस्तरका वायरलेस योजना पनि ल्याएको छ। साथै, फाइबर नेटवर्क विस्तारमा लगानीलाई पनि निरन्तरता दिएको छ।

अप्रिलदेखि जुनसम्मको अवधिमा एटीएन्डटीले मासिक बिल तिर्ने ४ लाख ३२ हजार नयाँ वायरलेस ग्राहक थपेको छ। फ्याक्टसेटका अनुसार विश्लेषकहरूले ३ लाख ३८ हजार ५ सय ग्राहक थपिने अनुमान गरेका थिए।

एप्टस क्यापिटल एडभाइजर्सका इक्विटी प्रमुख डेभिड वाग्नरले कम्पनीले लामो समयदेखि अघि बढाएको क्रस–सेलिङ रणनीतिको प्रभाव अहिले नतिजामा देखिन थालेको बताए। उनका अनुसार एटीएन्डटीले बजार हिस्सा पनि बढाइरहेको देखिन्छ।

एटीएन्डटीका उन्नत इन्टरनेट सेवा प्रयोग गर्ने करिब ४२.५ प्रतिशत घरपरिवारले कम्पनीकै वायरलेस सेवा पनि लिएका छन्।

कम्पनीका प्रमुख कार्यकारी अधिकृत जोन स्ट्यान्कीले लक्षित प्रचार अभियान र ग्राहक कायम राख्ने प्रयासले बन्डल अफरमा ग्राहक आकर्षित गर्न मद्दत गरेको बताए।

दोस्रो त्रैमासिकमा कम्पनीको कुल आम्दानी ३१.६ अर्ब डलर रहेको छ। एलएसईजीका अनुसार विश्लेषकहरूले ३१.८ अर्ब डलर आम्दानी हुने अनुमान गरेका थिए।

समायोजित प्रति सेयर आम्दानी ६५ सेन्ट रहेको छ, जबकि विश्लेषकहरूको औसत अनुमान ५९ सेन्ट थियो।

कम्पनीले उक्त त्रैमासिकमा ४.७ अर्ब डलर स्वतन्त्र नगद प्रवाह (फ्री क्यास फ्लो) भएको जनाएको छ। भिजिबल अल्फाका अनुसार यो ४.४३ अर्ब डलरको अनुमानभन्दा बढी हो।