काठमाडौं ।
तीन वर्षअघि तत्कालिन संघिय संसद भवन अगाडि प्रेमप्रसाद आचार्यको आत्मदाहपछि लेखिएको आफ्नो कविता अहिले भाइरल भएपछि सूचना तथा सञ्चारमन्त्री डा. विक्रम तिमिल्सिनाले फेरि अर्को कविता लेखेका छन्।
राहदानी विभाग अगाडि शुक्रबार आत्मदाह गरेका गणेश नेपालीको विषय समावेश गरेर सामाजिक सञ्जालमा उनले लेखेको पुरानो कविता भाइरल हुँदा चर्को आलोचनामा परेका थिए।
कतिपय सामाजिक सञ्जालकर्ताहरुले यसअघि सरकारलाई प्रश्न सोधेको तर आफू सरकारमा हुँदा चुपचाप भएको भन्दै आलोचना गरेका थिए।
शनिबार उनले फेसबुकमार्फत सार्वजनिक गरेको नयाँ कवितामा आगोका लप्का निभाउन आफूहरू रातदिन लागेको दाबी गर्दै एकदिन निभाएरै छाड्ने लेखेका छन्।
सञ्चारमन्त्री डा. विक्रम तिमिल्सिनाले नयाँबानेश्वरको तत्कालीन संसद् भवनअगाडि आचार्यले आत्मदाह गरेपछि तत्कालिन सरकारको विरोध गर्दै कविता लेखेका थिए।
जसमा आचार्य जल्दा तत्कालीन सत्ताधारी शक्ति सुरक्षा घेरामा रहेको भन्दै नजलेको बिम्ब प्रस्तुत गरेका थिए।
अहिले प्रकाशित कवितामा उनले आफूपनि ‘प्रश्न’को घेराबाट ‘जवाफ’को कठघरामा आइपुगेको भन्दै आगोका लप्काहरू निभाउन दिनरात लागेको र सेवक भएर निभाइ छाड्ने बताएका छन्।
प्रकाशित: २७ असार २०८३, शनिबार
