काठमाडौं ।
विद्युतीय कारलाई एक बिन्दुबाट अर्को बिन्दुसम्म ढुवानीको लागि प्रयोग गर्नुको साथै त्यसलाई घरमा ऊर्जा आपूर्ति गर्न ठूलो ब्याट्रीको रूपमा पनि प्रयोग गर्न सकिन्छ।
भी२एल (भेहिकल–टु–लोड) एडाप्टरको साथ विद्युतीय कारलाई विभिन्न हाउसहोल्ड अपलाइन्सेस (घरायसी उपकरणहरू) लाई विद्युत आपूर्ति गर्न प्रयोग गर्न सकिन्छ।
जर्मन अटोमोबाइल क्लब एडीएसीद्वारा गरिएको नयाँ परीक्षणको नतिजा अनुसार, विद्युतीय कारहरूले पावर बैंकको रूपमा धेरै राम्रोसँग काम गरे पनि, यो तरिकाले तिनीहरूलाई प्रयोग गर्नु धेरै महँगो सावित हुन सक्छ।
एडीएसीले विद्युतीय कारहरूलाई ऊर्जा स्रोतको रूपमा कति राम्रो र सुरक्षित रूपमा प्रयोग गर्न सकिन्छ भनेर पत्ता लगाउन चाहेको र बीएमडब्ल्यू आईएक्स३, बीवाईडी सिल, किया ईभी५, एमजी४, रेनो ५ र एक्सपेङ जी९ मोडेलहरूसँग परीक्षणहरू सञ्चालन गरेको टेलिग्राफले रिपोर्ट गरेको छ।
विद्युत कारलाई पावर स्रोतको रूपमा काम गर्नको लागि, यो दुई–तर्फी चार्जरहरूले सुसज्जित हुनुपर्दछ र भी२एल एडाप्टर प्रयोग गर्न सक्षम हुनुपर्नेछ। निर्माताहरूसँग फरक–फरक एडेप्टरहरू रहेकाछन् भने बीवाईडीले मात्र स्ट्यान्डर्ड इक्विपमेन्ट (मानक उपकरण) को रूपमा प्रदान गर्ने उल्लेख गरिएको छ।
परीक्षणको क्रममा, जर्मन विज्ञहरूले धेरै एक्सटर्नल डिभाइस (बाह्य उपकरण) हरूलाई विद्युतीय कारहरूमा जडान गर्दा भी२एल फङ्गसन प्रयोग गर्दा कारले आफैंले गर्ने अतिरिक्त ऊर्जा खपत धेरै उच्च भएको आश्चर्यजनक तथ्य पत्ता लगाएको छ।
किया ईभी५ को आन्तरिक खपत लगभग ३९० वाट भएको बताइएको छ भने रेनो ५ को खपत सबैभन्दा बढी ५०० वाट रहेको उल्लेख गरिएको छ। एडीएसीका अनुसार, प्रयोगकर्ताहरूले यो अतिरिक्त खपतलाई रातमा पारिवारिक घरको आधार भार जस्तै हो भनेर ध्यानमा राख्नु पर्नेछ।
केही समयको लागि ५० वाटको पावर भएको पोर्टेबल रेफ्रिजरेटर प्रयोग गर्न सम्भव भए पनि निरन्तर सञ्चालनलाई उपयुक्त नहुने एडीएसीले उल्लेख गरेको छ।
अर्कोतर्फ, परीक्षणहरूले पावर बैंकको रूपमा विद्युतीय सवारी साधनहरू प्रयोग गर्दा कुनै सुरक्षा समस्याहरू नभएको देखाएका छन्। योजनाबद्ध सर्ट सर्किट गरिसकेपछि पनि कुनै पनि सवारी साधनले क्षति भोग्नु नपरेको थप उल्लेख गरिएको छ।
साथै, निर्माताहरूले यो प्रणालीलाई प्रयोग गर्न सहज बनाउन सक्थे भनि विज्ञहरूको अनुमान गरेका छन्।
“इरर नोटिफिकेसन (त्रुटि सूचनाहरू)को सन्दर्भमा, कियाले मात्र प्रणाली ओभरलोड हुँदा ‘खपत धेरै उच्च’ भन्ने सन्देश प्रदर्शन गरेको” एडीएसीले उल्लेख गरेको छ।
भी२एल प्रयोग गर्दा अतिरिक्त विद्युत खपतः
प्रकाशित: ८ असार २०८३, सोमबार
