काठमाडौं ।
चिनियाँ प्रविधि कम्पनी बाइटडान्सले एआई चिप खरिद गर्न शाङ्घाईस्थित इलुभाटार कोरएक्ससँग वार्ता गरिरहेको छ। साथै उसले बाइडुको एआई चिप खरिदसम्बन्धी समान सम्झौताको पनि विचार गरिरहेको दुई स्रोतले बताएका छन्।
सम्झौता भएमा, इलुभाटार कोरएक्स हुवावे र क्याम्ब्रिकनपछि बाइटडान्सको तेस्रो प्रमुख स्वदेशी ग्राफिक्स प्रोसेसिङ युनिट (जीपीयू) आपूर्तिकर्ता बन्ने स्रोतहरूले बताएका छन्।
रोयटर्सका अनुसार टिकटकको मातृ कम्पनी बाइटडान्सले बाइडुको कुनलुनसिन चिप प्रयोग गर्ने सम्भावनाबारे पनि विचार गरिरहेको उनीहरूले बताए। वार्ता सार्वजनिक नभएकाले उनीहरूले आफ्नो नाम खुलाउन चाहेनन्। स्रोतका अनुसार टेन्सेन्टले यसअघि नै कुनलुनसिन चिप प्रयोग गरिरहेको छ। बाइटडान्स, इलुभाटार कोरएक्स, बाइडु र टेन्सेन्टले यस विषयमा प्रतिक्रिया दिन अस्वीकार गरेका छन्।
यी सम्भावित सम्झौताले चिनियाँ चिप उत्पादकहरूले विदेशी एआई चिपको विकल्प दिन थालेको देखाउँछ। उन्नत चिपमा अमेरिकी निर्यात नियन्त्रणबीच आत्मनिर्भरता बढाउन बेइजिङले स्वदेशी रूपमा विकसित चिपको प्रयोगलाई प्रोत्साहन गरिरहेको छ।
रोयटर्सले अप्रिलमा जनाए अनुसार चिनियाँ जीपीयू र एआई चिप उत्पादकहरूले गत वर्ष चीनको एआई एक्सेलेरेटर सर्भर बजारको झण्डै ४१ प्रतिशत हिस्सा ओगटेका थिए, जसले एनभिडियाको प्रभावशाली बजार हिस्सामा कमी ल्याएको छ।
एनभिडियाका प्रमुख कार्यकारी जेन्सेन हुआङका अनुसार चीनमा कम्पनीको बजार हिस्सा लगभग शून्यमा झरेको छ। टेन्सेन्टका प्रमुख रणनीति अधिकारी जेम्स मिचेलले मे महिनामा चिनियाँ एआई चिपहरू यस वर्षको दोस्रो छमाहीमा ठूलो परिमाणमा उपलब्ध हुने बताएका थिए।
चीनका प्रमुख जीपीयू स्टार्टअपमध्ये एक इलुभाटार कोरएक्सले यस वर्ष बाइटडान्सलाई कम्तीमा ५० हजार चिप आपूर्ति गर्ने अपेक्षा गरिएको छ। स्रोतका अनुसार तीमध्ये अधिकांश चिप अनुमानात्मक (इन्फरेन्स) कार्यका लागि प्रयोग हुनेछन्, किनकि बाइटडान्सले आफ्नो लोकप्रिय एआई च्याटबोट डौबाओको प्रयोगकर्ता आधार विस्तार गरिरहेको छ।
इन्फरेन्स कार्य भनेको प्रयोगकर्ताका प्रश्नको उत्तर दिने प्रक्रिया हो। यो एआई मोडल प्रशिक्षणभन्दा फरक हो, जहाँ सामान्यतया सबैभन्दा शक्तिशाली चिपहरू प्रयोग गरिन्छ। स्रोतहरूले सम्झौताका विवरण अन्तिम नभएको र परिवर्तन हुन सक्ने बताएका छन्।
चीनका ठूला प्रविधि कम्पनीमध्ये एक तथा एआई पूर्वाधारमा ठूलो लगानीकर्ता बाइटडान्ससँग सम्झौता हुनु इलुभाटार कोरएक्सका लागि महत्वपूर्ण व्यावसायिक उपलब्धि हुनेछ। एक स्रोतका अनुसार हालसम्म शाङ्घाईस्थित कम्पनीले मुख्यतः सरकारी खरिदसम्बन्धी परियोजनामा चिप आपूर्ति गर्दै आएको थियो।
जनवरीमा हङकङ स्टक एक्सचेन्जमा सूचीकृत इलुभाटार कोरएक्सले सन् २०२५ मा १ अर्ब युआन (१४ करोड ८० लाख अमेरिकी डलर) आम्दानी गरेको जनाएको थियो। त्यसको करिब ९० प्रतिशत आम्दानी जीपीयू बिक्रीबाट आएको थियो, जसमा स्वदेशी एआई हार्डवेयरको बढ्दो मागले सहयोग गरेको थियो।
कम्पनीको वेबसाइटअनुसार यसको टियानगाइ श्रृंखलाका चिपहरू एआई प्रशिक्षणका लागि तयार गरिएको हो भने झिकाइ श्रृंखला इन्फरेन्स कार्यका लागि लक्षित छ।
हुआताइ सेक्युरिटिजको अनुसन्धान प्रतिवेदनअनुसार इलुभाटार कोरएक्सको आम्दानी यस वर्ष ३ अर्ब ४ करोड युआन (४४ करोड ९८ लाख अमेरिकी डलर) पुग्ने अनुमान गरिएको छ।
कम्पनीको कुल चिप आपूर्ति १३९ प्रतिशतले बढेर एक लाखभन्दा बढी पुग्ने अपेक्षा गरिएको छ। प्रतिवेदनले झिकाइ इन्फरेन्स चिपको औसत बिक्री मूल्य १२ हजार युआन अर्थात् प्रतिचिप करिब १ हजार ७७५ अमेरिकी डलर रहेको अनुमान गरेको छ।
प्रकाशित: २ असार २०८३, मंगलवार
