दाताको सहयोगमा बालबालिकालाई कम्प्युटर शिक्षा

काठमाडौं ।

शुक्लाफाँटा नगरपालिका–११ अमरपुरस्थित दशरथ आधारभूत विद्यालयका विद्यार्थी अहिले कम्प्युटरको आधारभूत ज्ञान लिन थालेका छन् । स्थानीय समाजसेवी मानसिंह तिरुवाले विपन्न परिवारका बालबालिकालाई आधुनिक शिक्षा उपलब्ध गराउने उद्देश्यले विद्यालयलाई छ ओटा कम्प्युटर सहयोग गरेपछि विद्यार्थीहरू पहिलोपटक व्यवस्थित रूपमा कम्प्युटर शिक्षा लिन सक्षम भएका हुन् ।

कम्प्युटर उपलब्ध भएपछि कक्षा ४ र ५ का विद्यार्थीले सहज रूपमा कम्प्युटरको आधारभूत ज्ञान, टाइपिङ र देशविदेशका विविध शैक्षिक सामग्री हेर्न सक्ने सुविधा पाएका विद्यालयका प्रधानाध्यापक धर्मा ऐर भण्डारीले बताए। उनका अनुसार दक्ष शिक्षकको व्यवस्था गरी कम्प्युटरको प्रारम्भिक सीप सिकाउने काम नियमित रूपमा भइरहेको छ।

“कम्प्युटरको व्यावहारिक ज्ञानमा जोड दिएर विद्यार्थीलाई टाइपिङमा दक्ष बनाउँदैछौँ”, प्रअ भण्डारीले भने, “विद्यालयको आन्तरिक स्रोतमार्फत कम्प्युटर कक्षाका लागि फर्निचर र इन्टरनेटको व्यवस्था मिलाएका छौँ । इतिहास, विज्ञान, प्रविधि तथा विश्व घटनाक्रमबारे विद्यार्थीलाई जानकारी दिन कम्प्युटर निकै प्रभावकारी माध्यम बनेको छ ।”

उनका अनुसार विद्यालयमा अतिविपन्न, दलित तथा जनजाति समुदायका बालबालिका अध्ययन गर्दै आएका छन्।

कम्प्युटर कक्षा सुरु भएपछि विद्यालयमा विद्यार्थी सङ्ख्या उल्लेख्य रूपमा बढेको विद्यालय व्यवस्थापन समितिका अध्यक्ष कमल विकले बताए। “पहिले विद्यार्थी सङ्ख्या कम थियो, अहिले सङ्ख्या बढ्दै एक सयको हाराहारीमा पुगेको छ”, उनले भने। अधिकांश अभिभावक रोजगारीका लागि भारत जाने भएकाले विद्यार्थी सङ्ख्या स्थिर राख्न कठिनाइ हुने गरेको उनको भनाइ छ ।

“कति विद्यार्थी अभिभावकसँगै भारत जान्छन्, केही महिनापछि मात्र फर्कन्छन् । फर्किएपछि फेरि कक्षामा समावेश गराएर पठनपाठन अघि बढाउनुपर्छ”, अध्यक्ष विकले भने। विपन्नताका कारण भारतमा रोजगारीका लागि अभिभावकले जानुपर्ने बाध्यता बनेको उनको भनाइ छ ।

विद्यालयले आगामी शैक्षिकसत्रदेखि कक्षा १ देखि अङ्ग्रेजी माध्यममा पठनपाठन सञ्चालन गर्ने तयारी गरिरहेको अध्यक्ष विकले जानकारी दिए। उनका अनुसार यससँगै बालबालिका चिसो मौसममा न्यानो रहुन् भनेर अमेरिकामा बसोबास गर्ने प्रकाश सुनारले न्यानो ट्रयाकसुट सहयोग गरेका छन्।

शैक्षिकसत्रभरि स्टेशनरी तथा कार्यालय सामग्रीको अभाव नहोस् भनेर महालक्ष्मी बचत तथा ऋण सहकारी संस्थाले आवश्यक सामग्री उपलब्ध गराएको विद्यालयले जनाएको छ।

विद्यालय नजिकै बगिरहेको सनवोरा नदीले निरन्तर भूक्षय गरिरहेकाले विद्यालय संरचना जोखिममा परेको अध्यक्ष विकले बताए। “तटबन्ध निर्माणका लागि सरोकार भएका नकायमा सहयोगका लागि अनुरोध गरिरहेका छौँ, तर अहिलेसम्म चासो देखिएको छैन”, उनले चिन्ता व्यक्त गरे। रासस