अमेरिकी भूभागमा फर्मुला १ रेसहरू स्ट्रिम गर्नका एप्पलले गर्यो १५ करोड डलरको प्रस्ताव

काठमाडौं ।

एप्पलले सन् २०२६ देखि अमेरिकी भूभागमा फर्मुला १ रेसहरू स्ट्रिम गर्नका लागि वार्षिक कम्तीमा १५० मिलियन डलर मूल्यको प्रस्ताव पेश गरेको बिजनेस इन्साइडरले शुक्रबार स्रोत उल्लेख गर्दै जनाएको छ।

रिपोर्टअनुसार हाल फर्मुला १ प्रसारण अधिकार राखेको वाल्ट डिज्नीको ईएसपीएनले उक्त प्रस्तावसँग प्रतिस्पर्धा नगर्ने भएकाले एप्पल प्रमुख दावेदारको रूपमा अगाडि बढेको छ।

रोयटर्सका अनुसार एप्पलले प्रतिक्रिया अनुरोध अस्वीकार गरेको छ भने फर्मुला १ र यसको स्वामित्व भएको कम्पनी लिबर्टी मिडियाले पनि तुरुन्त प्रतिक्रिया दिएका छैनन्।

यो जानकारी एप्पलको ‘एफ१: द मुभी’ फिल्म सफल भएको केही समयपछि आएको हो। ब्राड पिट अभिनीत उक्त फिल्मले शुक्रबारसम्म विश्वभर ३०० मिलियन डलरभन्दा बढी आम्दानी गरिसकेको आईएमडीबीको बक्स अफिस मोजोको तथ्यांकले देखाउँछ।

रोयटर्सका अनुसार ईएसपीएनसँग हाल यो सिजनसम्म अमेरिकी प्रसारण अधिकार रहेका छन्। तर फेब्रुअरीमा ईएसपीएनको नयाँ सम्झौता गर्ने विशेषाधिकार अवधि सकिएको थियो।