Technology Khabar २६ असार २०८२, बिहीबार
काठमाडौं ।
इन्स्टा३६० ले मोटरसाइकल राइडरहरूका लागि बनाइएको आफ्नो एक्स५ एक्सन क्यामराको नयाँ संस्करण जारी गरेको छ। इन्स्टा३६० एक्स५ बीएमडब्लू मोटरराड एडिशन भनिने यो सीमित संस्करण मोडेलमा सडकमा प्रयोगको लागि डिजाइन गरिएका नयाँ सुविधाहरू समावेश गरिएका छन्।
क्यामरामा नियमित एक्स५ को जस्तै ८के ३६०–डिग्री भिडियो रेकर्डिङ उपलब्ध रहेको बताइएको छ र यो संस्करणको ब्याक कभर (पछाडिको आवरण) र एक्सेसरिज (सामानहरू) बीएमडब्लू मोटरराड ब्रान्डिङको साथ आउने उल्लेख गरिएको छ।
क्यामराभित्र इन्टरफेस र स्ट्याट ड्यासबोर्डमा बीएमडब्लू थिम (विषयवस्तु) रहेको बताइएको छ जसले फुटेजमार्फत गति र दूरी जस्ता रियल टाइम राइडिङ डाटा देखाउने उल्लेख गरिएको छ।
क्यामरामा बीएमडब्लू मोटरराड मिनी रिमोट मुख्य नयाँ सुविधाहरू मध्ये एक भएको बताइएको छ। यो ह्यान्डलबारमा जोडेर राख्न मिल्ने र राइडरहरूलाई एकल ट्यापमा रेकर्डिङ सुरु गर्न वा रोक्न सक्ने सुविधा प्रदान गर्नेछ। साथै यसले बारबाट हात नहटाई इन्स्टाफ्रेम मोड प्रयोग गरेर फिक्स्ड क्यामरा भ्यूज र पूर्ण ३६० भिडियो बीच स्विच गर्न पनि अनुमति दिनेछ।
क्यामरामा नयाँ २८०० एमएएच अल्ट्रा ब्याट्री समावेश गरिएको छ जुन मानक ब्याट्री भन्दा १७ प्रतिशत लामो समयसम्म टिक्ने दाबी गरिएको छ। यो बीएमडब्लू–ब्रान्डेड क्यारी पाउचको साथ पनि आउने बताइएको छ जसमा बलियो जिपर र नयाँ डिजाइन रहेको छ। क्यामरा राइडरहरूको लागि यसको प्रयोगमा केन्द्रित भिजुअल्सहरूसहितको नयाँ बक्समा आउने बताइएको छ।
यस क्यामराले विभिन्न राइडिङ कन्डिसन (अवस्थाहरू) मा राम्रो भिडियो गुणस्तरको लागि पियोरभिडियो मोडलाई समर्थन गर्ने उल्लेख गरिएको छ। साथै कठिन मौसमलाई ह्यान्डल गर्न सक्ने तवरले यो वाटरप्रूफ क्यामेरालाई निर्माण गरिएको थप उल्लेख गरिएको छ। फ्लोस्टेट स्टेबलाइजेसनले फुटेजलाई स्मुथ राख्न र इनभिजिबल सेल्फी स्टिकले क्लिन (सफा), सिनेम्याटिक शटहरू सिर्जना गर्न मद्दत गर्ने बताइएको छ।
इन्स्टा३६० एक्स५ बीएमडब्लू मोटरराड एडिशन अब विश्वव्यापी रूपमा सीमित संख्यामा उपलब्ध छ। इन्स्टा३६० स्टोरमा यस क्यामराको मूल्य ५९९.९९ डलर रहेको छ। साथै कम्पनीले गिभअवेमार्फत जुलाई १८ तारिखमा विजेताको घोषणा गर्ने गीज्मोचाइनाले रिपोर्ट गरेको छ।
प्रकाशित: २६ असार २०८२, बिहीबार
